Saudiyalik ayol ijtimoiy tarmoqlardagi postlari uchun 45 yillik qamoqqa hukm qilindi. Avvalroq boshqa bir ayol 34 yilga qamalgandi

Saudiya Arabistonida sud Nura bin Said al-Qahtaniy ismli ayolni ijtimoiy tarmoqlardagi postlari uchun 45 yil qamoqqa hukm qildi, deb yozadi Meduza.

Associated Press o‘z qo‘liga kelib tushgan sud hujjatiga tayanib xabar berishicha, sud mahkuma internet yordamida “jamiyat negiziga putur yetkazgan” va “jamoat tartibini buzgan”, degan qarorga kelgan.

Al-Qahtaniy ijtimoiy tarmoqlarda aynan nimalar yozgani noma’lum. DAWN tashkiloti (Shimoliy Afrika va Yaqin Sharqda demokratiya va inson huquqlari uchun kurashuvchi notijorat tashkilot) ma’lum qilishicha, ayblovlar terrorchilik va kiberjinoyatchilikka qarshi qonunlarga asoslangan bo‘lib, ular keng talqinga yo‘l qo‘yadi. Ishni odatda milliy xavfsizlik va terrorchilik haqidagi ishlar bilan shug‘ullanadigan ixtisoslashtirilgan sud ko‘rib chiqqan.

Ayolning o‘zi haqidagi tafsilotlar ham keltirilmagan. The Times uni ayollar huquqlari uchun kurashuvchi faol deb atagan, biroq Associated Press al-Qahtaniyning aktivistlik faoliyati haqida ma’lumotlar yo‘qligini yozgan. Shunisi ma’lumki, u 2021-yil iyulidan buyon hibsda saqlanmoqda, 45 yillik qamoq muddati esa unga apellyatsiya chog‘ida tayinlangan.

Al-Qahtaniyga nisbatan hukm — saudiyalik ayolga ijtimoiy tarmoqlardagi postlari uchun juda katta qamoq muddati belgilanishi bilan bog‘liq so‘nggi vaqtlardagi ikkinchi holatdir. Avgust o‘rtalarida 34 yoshli Salma ash-Shabob ayollar huquqlari uchun kurashgan siyosiy mahbuslarni ozod etish haqidagi da’vatlardan iborat tvitlari hamda boshqa huquq himoyachilarining xuddi shunday postlarini retvit qilgani uchun 34 yilga qamalgani ma’lum bo‘lgandi.