Италия ҳукумати россиялик миллиардернинг 11 та вилласини хатлади

Италия ҳукумати россиялик миллиардер Вячеслав Канторнинг 11 та вилласини хатлади, улар орасида Италия собиқ бош вазири Сильвио Берлусконининг оиласидан сотиб олинган вилла ҳам бор, деб ёзади «РБК».

Европа кенгаши Канторнинг активларини мусодара қилишни апрелда буюрган эди, ўшанда унга қарши шахсий санкциялар киритилганди. Бироқ мураккаб мулкчилик схемаси туфайли жараённи августдагина якунлашга муваффақ бўлишди.

Нашр аниқлик киритишича, виллалар Сардиниянинг шимоли-шарқий қирғоқларида, Порто-Ротондода жойлашган.

Улардан бири Берлусконининг «Чертоза» ёзги қароргоҳига қўшни жойлашган. Бундан ташқари, хатга олинган виллаларнинг бир қисми қачонлардир италиялик сиёсатчининг оиласидан харид қилинган. Хусусан, «Примавера» илгари Берлусконининг онасига, «Дольче Драго» эса унинг укаси Паолога тегишли бўлган.

Апрель бошида Евроиттифоқ ва Буюк Британия Канторга қарши шахсий санкциялар киритди. Ўша вақтда у минерал ўғитлар ишлаб чиқарувчи «Акрон» компанияси акцияларининг назорат пакетига эгалик қиларди. Июнда миллиардер 45,1 фоизлик улушини бошқа топ-менежерларга бериб, кимёвий компания назоратини ўзидан фориғ қилди.

Кантор Forbes’нинг шу йилги россиялик миллиардерлар рейтингида 27-ўринни эгаллайди. Унинг бойлиги 4,6 миллиард долларга баҳоланмоқда.