Vashington Kiyevga javob hujumiga tayyorlanishda yordam bergan. Bu haqda CNN amerikalik mansabdorlarga, shuningdek, G‘arb va Ukrainadagi manbalariga tayanib xabar berdi.
Ularning ma’lumotlariga ko‘ra, AQSH Ukrainani bir vaqtning o‘zida bir nechta frontlarda uzoq qolib ketmaslik uchun operatsiyani nishonlar va geografiya nuqtai nazaridan chegaralashga chaqirgan. Manbalarning aytishicha, dastlab Kiyev ancha keng qarshi hujum imkoniyatini ko‘rib chiqqan, biroq Xerson viloyati hududida uning ko‘lamlarini kamaytirishga qaror qilgan.
Bundan tashqari, Vashington Kiyev bilan harbiy o‘yinlarda ishtirok etgan, bu tahliliy mashqlar bo‘lib, Ukraina qurolli kuchlariga turli ssenariylarda aynan qanday qilib muvaffaqiyatga erishishni tushunishga yordam berishga qaratilgan.
Pentagon vakili brigada generali Pet Rayder ikki mamlakat harbiylari muntazam muloqot olib borishini tasdiqladi, ammo tafsilotlarni keltirishdan bosh tortdi. “Biz ukrainaliklarga o‘zlari duch kelayotgan xavflarni yaxshiroq anglashda va o‘z mamlakatini Rossiya tajovuzidan himoya qilishda yordam berish uchun ularga ma’lumotlar taqdim etamiz”, — dedi u va yakuniy qarorni Kiyev qabul qilishini ta’kidladi.
29-avgust kuni CNN razvedka ma’lumotlaridan xabardor bo‘lgan amerikalik mansabdorlarga tayanib, Ukraina kuchlari mamlakat janubida hujumga o‘tish uchun sharoitlarni yaratayotgani, hujumlar yerda va havoda bo‘lishi kutilayotganini yozgandi. O‘sha kuniyoq Ukraina janubiy qo‘mondonligi matbuot xizmati Ukraina qurolli kuchlari turli yo‘nalishlarda, shu jumladan, Xerson viloyatida hujum harakatlarini boshlaganini ma’lum qildi.
Rossiya Mudofaa vazirligi Ukraina qurolli kuchlari Xerson va Nikolayev viloyatlarida hujumga o‘tishga uringanini tasdiqladi, ammo u muvaffaqiyatsiz bo‘lganini qayd etdi. Ertasi kuni vazirlik Ukraina harbiylari Nikolayev va Krivoy Rog tomondan hujum qilishga intilganini, lekin “katta talafotlar” ko‘rganini ma’lum qildi.
Ukraina hukumati mamlakat janubida hujumga o‘tish rejalarini rasman tasdiqlamagan edi. Avgust boshida prezident ofisi maslahatchisi Mixail Podolyak BBC’ga bergan intervyusida bu haqdagi xabarlarni axborot kampaniyasining bir qismi deb atagandi. Davlat rahbari Vladimir Zelenskiy esa Kiyev harbiy xizmatchilarning asl niyatlarini oshkor etmasligini ta’kidlagandi.
Izoh (0)