Европада истеъмол нархлари август ойида йиллик ҳисобда 9,1 фоизга ўсди. Бу ҳақда Европа Иттифоқи статистика бошқармасининг дастлабки маълумотларига таяниб Bloomberg хабар бермоқда.
Шундай қилиб, инфляция июль ойидаги 8,9 фоизга нисбатан тезлашди ва ҳисоб-китоблар бошланганидан бери максимал даражада янгиланди.
Айни пайтда инфляция Европа Марказий банкининг 2 фоизлик кўрсаткичидан тўрт баравар юқори бўлиб турибди.
Озиқ-овқат ва энергиядан ташқари истеъмол нархлари август ойида ўтган ойдаги 4 фоизга нисбатан йиллик ҳисобда 4,3 фоизга ошди.
Энергия ресурслари ўтган йилнинг августига нисбатан 38,3 фоизга қимматлашди, бироқ ўсиш суръати бир ой олдинги 39,6 фоизга нисбатан бир оз секинлашди.
Озиқ-овқат, алкоголь ва тамаки маҳсулотлари 10,6 фоизга (июлда 9,8 фоизга), саноат маҳсулотлари 5 фоизга (4,5 фоизга), хизматлар 3,8 фоизга (3,7 фоизга) қимматлашди.
Август ойида истеъмол нархларининг ўсиши ўтган ойга нисбатан 0,5 фоизни ташкил этди. Июль ойида бу кўрсаткич 0,1 фоизга ошган.
Иқтисодчилар келгуси чоракда евроҳудудда рецессия бўлиши эҳтимолини тобора кўпроқ прогноз қилмоқда, чунки яшаш нархининг кўтарилиши пандемиядан энди қайта тикланаётган иқтисодларга путур етказмоқда.
Ҳукуматлар солиқларни камайтириш, уй хўжаликларига тўғридан-тўғри тўловлар ва компаниялар учун субсидиялар каби кўплаб чора-тадбирлар орқали энергия нархининг зарбасини қоплашга ҳаракат қилмоқда. Бу мақсадлар учун Европа Иттфиоқи 280 млрд евро сарфлаган.
Изоҳ (0)