Sovet Ittifoqi Kommunistik partiyasi (KPSS) markaziy qo‘mitasining so‘nggi bosh kotibi va SSSRning yagona prezidenti Mixail Gorbachyov 91 yoshida vafot etdi, deb xabar bermoqda Rossiya matbuoti Markaziy klinik kasalxonaga tayanib.
OAV Gorbachyov “og‘ir va uzoq davom etgan kasallikdan keyin” vafot etganini xabar qildi. Ularga ko‘ra, Gorbachyov o‘limidan sal avval kasalxonaga gemodializ uchun kelgan.
So‘nggi yillarda Gorbachyov buyrak kasalligidan aziyat chekayotgan edi. Xususan, siyosatchi bir necha yil davomida gemodializdan o‘tgani haqida ma’lumotlar bor.
Siyosatchi Moskvadagi Novodevichiye qabristonida rafiqasi Raisa Gorbachyova yoniga dafn etiladi. Dafn marosimining sanasi hali belgilanmagan.
Mixail Gorbachyov 1931-yil 2-martda hozirgi Stavropol o‘lkasi hududida tug‘ilgan. Moskva davlat universitetining yuridik fakultetini qizil diplom bilan tamomlagan.
Gorbachyov davrida Afg‘onistondagi o‘n yillik harbiy kampaniya yakunlandi, u yerdan sovet qo‘shinlari olib chiqildi. 1990-yilda Mixail Gorbachyov SSSRning birinchi prezidenti bo‘lib, bu lavozimni egallagan yagona siyosatchi sifatida tarixga kirdi. Xuddi shu yili u tinchlik bo‘yicha Nobel mukofotiga sazovor bo‘ldi.
Izoh (0)