Совет Иттифоқи Коммунистик партияси (КПСС) марказий қўмитасининг сўнгги бош котиби ва СССРнинг ягона президенти Михаил Горбачёв 91 ёшида вафот этди, деб хабар бермоқда Россия матбуоти Марказий клиник касалхонага таяниб.
ОАВ Горбачёв «оғир ва узоқ давом этган касалликдан кейин» вафот этганини хабар қилди. Уларга кўра, Горбачёв ўлимидан сал аввал касалхонага гемодиализ учун келган.
Сўнгги йилларда Горбачёв буйрак касаллигидан азият чекаётган эди. Хусусан, сиёсатчи бир неча йил давомида гемодиализдан ўтгани ҳақида маълумотлар бор.
Сиёсатчи Москвадаги Новодевичие қабристонида рафиқаси Раиса Горбачёва ёнига дафн этилади. Дафн маросимининг санаси ҳали белгиланмаган.
Михаил Горбачёв 1931 йил 2 мартда ҳозирги Ставропол ўлкаси ҳудудида туғилган. Москва давлат университетининг юридик факультетини қизил диплом билан тамомлаган.
Горбачёв даврида Афғонистондаги ўн йиллик ҳарбий кампания якунланди, у ердан совет қўшинлари олиб чиқилди. 1990 йилда Михаил Горбачёв СССРнинг биринчи президенти бўлиб, бу лавозимни эгаллаган ягона сиёсатчи сифатида тарихга кирди. Худди шу йили у тинчлик бўйича Нобель мукофотига сазовор бўлди.
Изоҳ (0)