Rossiya prezidenti Vladimir Putin Mixail Gorbachyovning o‘limi yuzasidan chuqur hamdardlik bildirdi, deb yozadi “RBK” prezident matbuot kotibi Dmitriy Peskovga tayanib.
“Prezident Putin Mixail Gorbachyovning vafoti munosabati bilan chuqur hamdardlik izhor etadi. Ertalab u siyosatchining yaqinlari va qarindoshlariga hamdardlik telegrammasini yuboradi”, — dedi Kreml vakili.
Sovet Ittifoqi Kommunistik partiyasi (KPSS) markaziy qo‘mitasining so‘nggi bosh kotibi va SSSRning yagona prezidenti Mixail Gorbachyov 91 yoshida vafot etdi.
OAV Gorbachyov “og‘ir va uzoq davom etgan kasallikdan keyin” vafot etganini xabar qildi. Ularga ko‘ra, Gorbachyov o‘limidan sal avval kasalxonaga gemodializ uchun kelgan.
So‘nggi yillarda Gorbachyov buyrak kasalligidan aziyat chekayotgan edi. Xususan, siyosatchi bir necha yil davomida gemodializdan o‘tgani haqida ma’lumotlar bor.
Siyosatchi Moskvadagi Novodevichiye qabristonida rafiqasi Raisa Gorbachyova yoniga dafn etiladi. Dafn marosimining sanasi hali belgilanmagan.
Izoh (0)