Mixail Gorbachyov 30-avgust kuni Moskvada uzoq davom etgan og‘ir kasallikdan keyin vafot etdi. U 91 yoshda edi. G‘arbning sobiq va amaldagi siyosatchilari SSSRning yagona prezidenti haqida qanday fikrlar bildirganini “RBK” o‘z maqolasida keltirib o‘tdi.
AQSH prezidenti Jo Bayden: “U oshkoralik (glasnost) va qayta qurish (perestroyka)ga shunchaki shiorlar sifatida emas, balki ko‘p yillik yakkalanish va mahrumlikdan keyin Sovet ittifoqi xalqi uchun olg‘a boshlovchi yo‘l sifatida ishonardi. Bu noyob yetakchi — tasavvuri boy, boshqa kelajakning imkoni borligini ko‘rishga va unga erishish uchun jasurlik bilan o‘z karyerasini xavf ostiga qo‘yishga qodir insonning intilishlari edi. Buning natijasida millionlab odamlar uchun yanada xavfsizroq dunyo va katta erkinlik yuzaga keldi”.
Fransiya prezidenti Emmanuel Makron: “Mixail Gorbachyovning vafoti munosabati bilan hamdardlik bildiraman, uning tanlovi rossiyaliklar uchun erkinlikka yo‘l ochdi. Uning Yevropadagi tinchlikka sodiqligi bizning umumiy tariximizni o‘zgartirdi”.
BMT bosh kotibi Antoniu Guterrish: “Mixail Gorbachyov tarixning yo‘nalishini o‘zgartirgan noyob davlat arbobi edi. Dunyo global ko‘lamdagi atoqli yetakchini, ko‘p tomonlama aloqalar tarafdorini va tinim bilmas tinchlik kurashchisini yo‘qotdi. Men uning vafotidan chuqur qayg‘udaman”.
Yevrokomissiya rahbari Ursula fon der Lyayyen: “Mixail Gorbachyov obro‘li va hurmatli yetakchi edi. U sovuq urush tugashida va temir parda tushishida hal qiluvchi rolni o‘ynadi. U erkin Yevropaga yo‘l ochdi. Bu merosni biz unutmaymiz”.
Yaponiya bosh vaziri Fumio Kisida: “Sovet ittifoqi yetakchisi sifatida, janob Gorbachyov Yevropaning parchalanishini yengib o‘tishda, shuningdek, Ikkinchi jahon urushidan keyin Sharq va G‘arb o‘rtasidagi ziddiyatning oldini olishda muhim rol o‘ynadi. AQSH bilan yadro qurollarini kamaytirish haqida kelishuvga erishgan holda, u sovuq urush tugashiga olib kelgan odam hisoblanadi”.
Buyuk Britaniya bosh vaziri Boris Jonson: “Men Gorbachyovning vafoti haqidagi xabardan qayg‘udaman. Doim uning jasorati va halolligiga qoyil qolganman, sovuq urushni tinch yo‘l bilan tugatib, u ushbu xislatlarini namoyon qilgan”.
BMT Bosh assambleyasi raisi Abdulla Shahid: “Sovet ittifoqining so‘nggi prezidenti va tinchlik bo‘yicha Nobel mukofoti sovrindori (1990), sovuq urushning qirg‘inlarsiz tugashiga olib kelgan radikal islohotlar yo‘lini tanlagan Mixail Gorbachyovning vafoti haqidagi xabardan qayg‘uga tushdim”.
Avstriya kansleri Karl Nexammer: “Aynan Mixail Gorbachyov Yevropada “temir parda” tushib, sovuq urush tugaganidan keyin Sharq va G‘arbning yaqinlashuviga yordam berdi”.
Britaniya tashqi ishlar vaziri Liz Trass: “Mixail Gorbachyov G‘arb yetakchilari bilan sovuq urushni tugatish ustida ishlab, global xavfsizlik va barqarorlikka ulkan hissa qo‘shgan atoqli davlat arbobi edi. Har qachongidan ko‘ra ko‘proq hozir hamkorlik va tinchlik bo‘yicha ushbu meros tantana qilishi kerak”.
AQSH sobiq davlat kotibi Kondoliza Rays: “Men Mixail Gorbachyovning vafoti haqidagi xabardan qayg‘udaman. U o‘z xalqi uchun eng yaxshi hayotni ta’minlashga intilgan odam edi. Uning hayoti muhim ahamiyatga ega edi, chunki usiz va uning jasoratisiz sovuq urushga tinch yo‘l bilan nuqta qo‘yish imkonsiz bo‘lgan bo‘lardi”.
AQSH sobiq davlat kotibi Genri Kissinjer: “Gorbachyov ulkan ishlarni amalga oshirdi, ammo o‘zining barcha niyatlarini ro‘yobga chiqara olmadi. U jamiyat hali oxirigacha tayyor bo‘lmagan g‘oyalarni amalga oshirgani uchun qisman jabr ko‘rdi. Biroq G‘arbiy Yevropadagi odamlar va germaniyaliklar, oxir-oqibat rossiyaliklar ushbu erkinlik g‘oyalari bilan olg‘a yurishdagi ko‘tarinki ruh va jasorat uchun uning oldida qarzdordir”.
Italiya sobiq bosh vaziri Silvio Berluskoni: “Demokratiya chempioni ketdi. Mixail Gorbachyov — XX asr tarixini o‘zgartirgan inson. Xalqaro siyosatda hozirgidek juda qiyin paytda uning uzoqni ko‘ra bilish qobiliyati va sog‘lom fikrining o‘rni bilinib qoladi”.
Izoh (0)