Михаил Горбачёв 30 август куни Москвада узоқ давом этган оғир касалликдан кейин вафот этди. У 91 ёшда эди. Ғарбнинг собиқ ва амалдаги сиёсатчилари СССРнинг ягона президенти ҳақида қандай фикрлар билдирганини «РБК» ўз мақоласида келтириб ўтди.
АҚШ президенти Жо Байден: «У ошкоралик (гласность) ва қайта қуриш (перестройка)га шунчаки шиорлар сифатида эмас, балки кўп йиллик яккаланиш ва маҳрумликдан кейин Совет иттифоқи халқи учун олға бошловчи йўл сифатида ишонарди. Бу ноёб етакчи — тасаввури бой, бошқа келажакнинг имкони борлигини кўришга ва унга эришиш учун жасурлик билан ўз карьерасини хавф остига қўйишга қодир инсоннинг интилишлари эди. Бунинг натижасида миллионлаб одамлар учун янада хавфсизроқ дунё ва катта эркинлик юзага келди».
Франция президенти Эммануэль Макрон: «Михаил Горбачёвнинг вафоти муносабати билан ҳамдардлик билдираман, унинг танлови россияликлар учун эркинликка йўл очди. Унинг Европадаги тинчликка содиқлиги бизнинг умумий тарихимизни ўзгартирди».
БМТ бош котиби Антониу Гутерриш: «Михаил Горбачёв тарихнинг йўналишини ўзгартирган ноёб давлат арбоби эди. Дунё глобал кўламдаги атоқли етакчини, кўп томонлама алоқалар тарафдорини ва тиним билмас тинчлик курашчисини йўқотди. Мен унинг вафотидан чуқур қайғудаман».
Еврокомиссия раҳбари Урсула фон дер Ляйен: «Михаил Горбачёв обрўли ва ҳурматли етакчи эди. У совуқ уруш тугашида ва темир парда тушишида ҳал қилувчи ролни ўйнади. У эркин Европага йўл очди. Бу меросни биз унутмаймиз».
Япония бош вазири Фумио Кисида: «Совет иттифоқи етакчиси сифатида, жаноб Горбачёв Европанинг парчаланишини енгиб ўтишда, шунингдек, Иккинчи жаҳон урушидан кейин Шарқ ва Ғарб ўртасидаги зиддиятнинг олдини олишда муҳим роль ўйнади. АҚШ билан ядро қуролларини камайтириш ҳақида келишувга эришган ҳолда, у совуқ уруш тугашига олиб келган одам ҳисобланади».
Буюк Британия бош вазири Борис Жонсон: «Мен Горбачёвнинг вафоти ҳақидаги хабардан қайғудаман. Доим унинг жасорати ва ҳалоллигига қойил қолганман, совуқ урушни тинч йўл билан тугатиб, у ушбу хислатларини намоён қилган».
БМТ Бош ассамблеяси раиси Абдулла Шаҳид: «Совет иттифоқининг сўнгги президенти ва тинчлик бўйича Нобель мукофоти совриндори (1990), совуқ урушнинг қирғинларсиз тугашига олиб келган радикал ислоҳотлар йўлини танлаган Михаил Горбачёвнинг вафоти ҳақидаги хабардан қайғуга тушдим».
Австрия канцлери Карл Нехаммер: «Айнан Михаил Горбачёв Европада «темир парда» тушиб, совуқ уруш тугаганидан кейин Шарқ ва Ғарбнинг яқинлашувига ёрдам берди».
Британия ташқи ишлар вазири Лиз Трасс: «Михаил Горбачёв Ғарб етакчилари билан совуқ урушни тугатиш устида ишлаб, глобал хавфсизлик ва барқарорликка улкан ҳисса қўшган атоқли давлат арбоби эди. Ҳар қачонгидан кўра кўпроқ ҳозир ҳамкорлик ва тинчлик бўйича ушбу мерос тантана қилиши керак».
АҚШ собиқ давлат котиби Кондолиза Райс: «Мен Михаил Горбачёвнинг вафоти ҳақидаги хабардан қайғудаман. У ўз халқи учун энг яхши ҳаётни таъминлашга интилган одам эди. Унинг ҳаёти муҳим аҳамиятга эга эди, чунки усиз ва унинг жасоратисиз совуқ урушга тинч йўл билан нуқта қўйиш имконсиз бўлган бўларди».
АҚШ собиқ давлат котиби Генри Киссинжер: «Горбачёв улкан ишларни амалга оширди, аммо ўзининг барча ниятларини рўёбга чиқара олмади. У жамият ҳали охиригача тайёр бўлмаган ғояларни амалга оширгани учун қисман жабр кўрди. Бироқ Ғарбий Европадаги одамлар ва германияликлар, охир-оқибат россияликлар ушбу эркинлик ғоялари билан олға юришдаги кўтаринки руҳ ва жасорат учун унинг олдида қарздордир».
Италия собиқ бош вазири Сильвио Берлускони: «Демократия чемпиони кетди. Михаил Горбачёв — ХХ аср тарихини ўзгартирган инсон. Халқаро сиёсатда ҳозиргидек жуда қийин пайтда унинг узоқни кўра билиш қобилияти ва соғлом фикрининг ўрни билиниб қолади».
Изоҳ (0)