Ukraina Qurolli kuchlari (QK) bo‘linmalari mamlakat janubida hujumga o‘tishga urindi, ammo hujumlar qaytarildi, Ukraina QK esa “katta talafotlar” ko‘rdi, deyiladi Rossiya Mudofaa vazirligi xabarida.
“Ukraina qo‘shinlarining Nikolayevo-Krivoy Rog va boshqa yo‘nalishlardagi hujumlari tor-mor qilinishi natijasida dushman juda katta yo‘qotishlarga uchradi. Dushmanning hujumini qaytarish chog‘ida Rossiya qo‘shinlari tomonidan g‘arbiy Ukrainadan operatsiyada qatnashish uchun tashlangan Ukraina QK 128-alohida tog‘ hujum brigadasi bo‘linmalari tor-mor keltirildi”, — deyiladi xabarda.
Mudofaa vazirligi qayd etishicha, ushbu brigadaning besh nafar harbiy xizmatchisi qurollarini tashlab, asirlikka taslim bo‘lgan.
Shuningdek, xabarga ko‘ra, o‘tgan bir kecha-kunduzda Rossiya harbiylari Ukrainaning 48 ta tankini, 46 ta piyoda qo‘shinlar jangovar mashinasini, 37 ta boshqa jangovar zirhli mashinalarni, sakkizta yirik kalibrli pulemyotli pikapni yo‘q qilgan, 1,2 mingdan ortiq ukrainalik harbiy xizmatchilar halok bo‘lgan.
Eslatib o‘tamiz, 29-avgust kuni Ukraina armiyasi anchadan beri kutilayotganidek, mamlakatning bosib olingan janubiy qismiga hujum boshladi. Rossiya Mudofaa vazirligi Ukrainaning hujumi muvaffaqiyatsizlikka uchraganini ma’lum qildi. Keyinroq CNN Ukraina armiyasidagi manbasiga tayanib, UQK Xerson viloyatida to‘rtta qishloqni ozod etganini ma’lum qildi.
Izoh (0)