Braziliya chakalakzorlarida tub qabilalardan birining so‘nggi vakili vafot etdi. U 26 yil butunlay yolg‘iz yashagan

Braziliya chakalakzorlarida mahalliy tub qabilalardan birining so‘nggi vakili vafot etdi, u 26 yil davomida to‘liq izolyatsiyada yashagan, deb yozadi Meduza.

Erkakning jasadi 23-avgust kuni o‘zining poxoldan yasalgan kulbasi yonidagi to‘r belanchakdan topilgan — uni Hindular milliy fondi hukumat tashkiloti xodimlari aniqlagan, ular ko‘p yillar davomida masofadan turib erkakni kuzatib borgan.

Dastlabki ma’lumotlarga ko‘ra, taxminan 60 yoshlardagi erkak tabiiy sabablarga ko‘ra vafot etgan, ammo o‘limning aniq sababini qayd etish uchun uning jasadi baribir yorib ko‘riladi.

Ushbu erkak tegishli bo‘lgan qabila 1970-yillardan boshlab plantatorlar tomonidan yo‘q qilingan. Braziliya qonunlariga ko‘ra, mahalliy qabilalar yashaydigan yerlar daxlsiz hisoblanadi. Zamindorlar va noqonuniy oltin izlovchilar tub aholining qirilib ketishidan bevosita manfaatdordir — chunki shunday bo‘lgan taqdirda, ular qabilalarning hududlarida faoliyat olib borish imkoniyatiga ega bo‘ladi. Shuning uchun qabilalar muntazam ravishda hujumlarga uchraydi.

Erkak taalluqli bo‘lgan qabilaning hududi qariyb to‘rt ming gektar maydonga ega bo‘lib, uning atrofida xususiy fermalar joylashgan edi. 1996-yilda hujum oqibatida erkakning omon qolgan so‘nggi olti qabiladoshi o‘ldirilgach, u butunlay yolg‘iz qolgandi. O‘shandan buyon Hindular milliy fondi agentlari uning xavfsizligini ta’minlash uchun yashirincha kuzatuv olib borgan.

Erkak OAVlarda “O‘radagi odam” sifatida tanildi: u o‘zi yashirinishi uchun yoki yovvoyi hayvonlarni ovlash uchun katta chuqurlar qazirdi. Ovdan tashqari, u termachilik bilan shug‘ullangan, shuningdek, kichikroq yer maydonlariga makkajo‘xori va papayya ekkan, ba’zan esa o‘ziga poxoldan kulbalar yasagan. Huquq himoyachilari ishtirokida u haqda bir nechta filmlar ishlangan, bundan maqsad — Amazoniya tub qabilalarining yo‘q qilinishi muammosiga e’tibor qaratish edi.

Erkak mansub bo‘lgan qabila nomi, shuningdek, uning a’zolari so‘zlashgan til noma’lum bo‘lib qoldi. U “muloqotga kirishmaydigan” qabila bo‘lib, hukumat va olimlar hech qachon uning a’zolari bilan muloqot qilishga urinmagan. Bu hindularning o‘zlari uchun xavfli bo‘lishi mumkin edi: xususan, ko‘pchilik keng tarqalgan infeksiyalarga nisbatan immuniteti bo‘lmagani sababli, ular boshqa odamlar uchun anchadan buyon jiddiy xavf tug‘dirmaydigan kasalliklardan vafot etishi mumkin. Bunday guruhlarni olimlar uzoqdan turib kuzatadi, ular haqidagi ma’lumotni ham yakkalanish darajasi uncha kuchli bo‘lmagan va muntazam ravishda hukumat bilan aloqada bo‘luvchi boshqa qabilalar vakillaridan oladi.

Braziliya chakalakzorlarida jami 240 ga yaqin qabilalar mavjud.