Eron hukumati Iroq bilan chegaradagi nazorat-o‘tkazish punktlari ishini to‘xtatdi. Bu haqda Eron ichki ishlar vazir o‘rinbosari Majid Mirahmadiga tayanib, “Kommersant” xabar bermoqda.
Bu qaror Bag‘dodda boshlangan tartibsizliklar fonida qabul qilingan. Eron hukumati ham fuqarolarini evakuatsiya qilish uchun Iroqqa favqulodda parvoz uyushtirmoqda.
Eron elchixonasi o‘z fuqarolaridan Bag‘dodga, shuningdek, Qozimiya va Samarra shaharlariga sayohat qilishdan tiyilishni so‘ragan.
Shuningdek, Eronning Imom Xomayniy xalqaro aeroporti ba’zi aviakompaniyalari ham Iroq poytaxtiga parvozlarni bekor qilganini ma’lum qildi.
Kecha, 29-avgust kuni shia imomi Muqtada as-Sadr tarafdorlari Bag‘doddagi Iroq hukumati qarorgohiga bostirib kirishga harakat qildi. Shu kuni Iroq xavfsizlik kuchlari parlament binosi ustidan nazoratni tiklab olishga muvaffaq bo‘ldi. To‘qnashuvlar paytida 30 dan ortiq odam halok bo‘lgan, 700 ga yaqin kishi jarohat olgan.
Shu munosabat bilan Birlashgan Millatlar Tashkiloti Bosh kotibi Antoniu Guterrish Iroqdagi mojaro tomonlarini keskinlikni kamaytirishga chaqirdi.
Izoh (0)