Bag‘dodning hukumat va diplomatik muassasalar joylashgan, qo‘riqlanuvchi “yashil hudud”iga to‘rtta raketa kelib tushdi. Bu haqda Al Hadath va Reuters xabar bermoqda, deb yozadi “RBK”. Raketalar turar joylarga zarar yetkazgan, jabrlanganlar haqida ma’lumot berilganicha yo‘q.
Tunda shaharda artilleriya va raketa orqali otishmalar tovushlari eshitilgan, ko‘chalarda qurollangan odamlar yurgan.
Ayni paytda Iroqda noroziliklar avj olgan, namoyishchilarning huquq-tartibot organlari bilan to‘qnashuvlari oqibatida, so‘nggi ma’lumotlarga ko‘ra, 23 kishi halok bo‘lib, 350 dan ortiq odam jabrlangan.
Avvalroq ijtimoiy tarmoqlarda tarqalgan videolarga tayanib, AQSHning Iroqdagi xodimlari vertolyotlarda “yashil hudud” (Bag‘dodning hukumat va chet el obyektlari joylashgan tumani)dan olib ketilayotgani xabar berilgan edi. Biroq Davlat departamenti noroziliklar fonida o‘z diplomatlari evakuatsiya qilingani haqidagi axborotni yolg‘on deb atadi.
Iroqdagi noroziliklar Muqtadi as-Sadr o‘z siyosiy faoliyatini yakunlash qarorini e’lon qilganidan keyin yana kuchayib ketdi. U bu qarorini mamlakatdagi siyosiy vaziyat boshi berk ko‘chaga kirib qolgani bilan izohladi.
Shunda uning tarafdorlari Bag‘dodda hukumat shtabi majlis o‘tkazadigan Respublika saroyiga bostirib kirdi. Vazirlar kengashi ish to‘xtatib turilishini ma’lum qildi, Iroq poytaxtida komendantlik soati e’lon qilindi.
Iroq bosh vaziri Mustafo al-Kozimiy as-Sadrga murojaat qilib, o‘z tarafdorlarini hukumat binolari va “yashil hudud”ni tark etishga chaqirishni talab qildi.
As-Sadr o‘zini xoh AQSH va G‘arb tomonidan, xoh Eron tomonidan bo‘lsin, har qanday chet el aralashuviga qarshi chiqadigan millatchi (natsionalist) deb ko‘rsatadi. Biroq saylovlardan keyin sadrchilar boshqa partiyalar bilan qarama-qarshiliklar tufayli hukumatni shakllantira olmadi.
Hozir sadrchilar mamlakat bosh vaziri lavozimiga as-Sadrning raqibi — Muhammad as-Sudaniy nomzodi qo‘yilishiga qarshi chiqmoqda. U “Koordinatsion tuzilma” bloki vakili bo‘lib, ushbu shialar partiyalarining siyosiy alyansi, xuddi as-Sudaniyning o‘zi kabi, namoyishchilar fikricha, qo‘shni Eronning gumashtasidir.
Iroqdagi siyosiy inqiroz 2021-yil kuzidan buyon davom etmoqda. O‘shanda mamlakatda parlament saylovlari bo‘lib o‘tgan, qo‘lga kiritilgan mandatlar soni bo‘yicha as-Sadr tarafdorlari yetakchi bo‘lgan edi. Saylovdan keyin yangi bosh vazir tayinlanishi kerak edi, biroq bu haligacha amalga oshirilgani yo‘q, sadrchilar esa parlamentdan chiqishini e’lon qildi. Bosh vazir lavozimida 2020-yilda tayinlangan Mustafo al-Kozimiy ishlashda davom etmoqda.
Izoh (0)