Тошкент вилоятида Range Rover бошқа автомобилларга халақит қилиб ҳаракатлангани ҳақида хабар берилганди. Йўл ҳаракати хавфсизлиги хизматининг маълум қилишича, қоидабузар ҳайдовчига чора кўрилди.
Ижтимоий тармоқда Range Rover русумли, 01 517 LJA давлат рақам белгили автомобиль ҳайдовчиси авария ҳолатини юзага келтириши мумкин бўлган турли хавфли манёврлар билан ҳаракатлангани акс этган видео тарқалди. Мазкур видео ходимлар томонидан ўрганилиб, ҳайдовчи — 1979 йилда туғилган Нишонов Дилмурод Зокировичга нисбатан Маъмурий жавобгарлик тўғрисидаги кодекснинг 128⁵-моддаси (транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши) 2-қисми билан чора кўрилди.
Ҳар қандай қоидабузарлик ва ҳуқуқбузарлик учун қонунда белгиланган тартибда чора кўрилади. Айрим ижтимоий тармоқ обуначиларидан асосланмаган, аниқлик киритилмаган маълумотларни турли ноўрин изоҳлар билан омма эътиборига тарқатмасликни сўраймиз. Ҳолатда акс этган барча иштирокчиларнинг хатти-ҳаракатига ҳуқуқий баҳо берилади, мазкур йўналишда суриштирув ишлари олиб борилмоқда.
Шунингдек, ушбу видеолавҳани тасвирга олган транспорт воситаси ҳайдовчиси ҳамда Nexia-3 русумли автомобилни бошқарган ҳайдовчиларнинг шахсини аниқлашга қаратилган тадбирлар олиб борилмоқда, уларнинг ҳаракатларига ҳам ҳуқуқий баҳо берилади. Барча ҳайдовчилардан қоидаларга риоя қилишларини сўраймиз, — дейилади хабарда.
Изоҳ (0)