Surxondaryoda YPX Tracker’i 77 ta qoidabuzarlik sodir etgani aniqlandi

Ijtimoiy tarmoqlarda Surxondaryo viloyati IIB JXX YHXB tasarrufidagi Tracker xizmat mashinasi yo‘l harakati qoidalarini buzgani uchun hisoblangan jarimalar undirilmayotgani to‘g‘risida xabarlar tarqaldi. Viloyat prokuraturasi holat yuzasidan ma’lumot berdi.

Aniqlanishicha, Surxondaryo viloyati IIB JXX YHXB tasarrufida bo‘lgan maxsus jihozlangan Tracker rusumli 75 330 VSF davlat raqam belgili xizmat mashinasi Surxondaryo viloyati IIB JXX YHXB YPXB 3-safarbar guruhi komandiriga xizmatda foydalanish uchun biriktirilgan.

Surxondaryo viloyati IIB JXX YHXBda o‘rnatilgan maxsus avtomatlashtirilgan foto va video qayd etish texnika vositalari orqali aniqlangan huquqbuzarliklarni qayd etish ma’lumotlar bazasi tekshirib ko‘rilgan.

Tekshiruv natijasida ushbu transport vositasi mulkdoriga nisbatan Ma’muriy javobgarlik to‘g‘risidagi kodeksning 171, 3091, 248, 304, va 307-moddalariga asoslangan holda 77 ta holatda belgilangan harakat tezligi oshirganlik holati yuzasidan YHXB MAB mas’ul xodimlari tomonidan jarima belgilangani aniqlangan.

“Surxondaryo viloyati hududida sodir etilgan 77 ta holat viloyat hududida jamoat tartibini saqlash, jinoyatchilikni oldini olish, viloyatga tashrif buyurgan yuqori martabali mehmonlarni xavfsizligini ta’minlash, viloyat hududida o‘tkaziladigan ommaviy tadbirlar va o‘quv mashg‘ulotlarida harakat xavfsizligini ta’minlash va o‘z vaqtida belgilangan topshiriqlarni amalga oshirishda, pul va portlovchi moddalarni o‘z vaqtida kechiktirmasdan manziliga yetkazish maqsadida kuzatuvlarni amalga oshirish jarayonida belgilangan harakat tezligini oxirgi zarurat holatida amalga oshirgani bo‘yicha YHXB MAB mas’ul xodimlari tomonidan qayta ko‘rib chiqilmoqda”, — deyiladi xabarda.