Prezident Shavkat Mirziyoyevning qator farmonlariga muvofiq, O‘zbekiston mustaqilligining 31 yilligi munosabati bilan ko‘plab o‘zbekistonliklar faxriy unvonlar, orden va medallar bilan taqdirlangan edi.
Bugun, 30-avgust kuni Ko‘ksaroyda ushbu mukofotlarni topshirish marosimi bo‘ldi, deb xabar bermoqda “Daryo” muxbiri.
Prezident Shavkat Mirziyoyev yig‘ilganlarni avvalo Mustaqillik bayrami bilan tabrikladi.
“Biz tahlikali zamonda yashayapmiz. Shu zamonda biz o‘zimizning manfaatimizni o‘ylab, o‘zimiz uchun harakat qilyapmiz. Biz yakkayu-yagona to‘g‘ri yo‘limiz — xalqimizning manfaatimizni ko‘zlab ishlarni olib boryapmiz. Bizga hech kim chetdan kelib yordam bermaydi”, — dedi davlat rahbari.
Shavkat Mirziyoyev o‘tgan hafta Samarqandda ochilgan turizm markazi, kecha Urganchda ochilgan Jaloliddin Manguberdi haykalini ochish — o‘zligimizni yanada chuqurroq anglashga yordam berishini aytdi.
“Xabaringiz bor, turli soha va tarmoqlarda barchaga ibrat va namuna bo‘lib mehnat qilayotgan bir guruh yurtdoshlarimiz davlatimizning yuksak mukofotlari bilan taqdirlandilar. An’anaga muvofiq, bugun sizlarga mana shu faxrli unvon, orden va medallarni topshirish uchun yig‘ildik. Davlatimizning oliy mukofotlarini siz azizlarga – o‘z egalariga topshirish men uchun haqiqatan ham katta sharafdir”, — deya qo‘shimcha qildi davlat rahbari.
Izoh (0)