Bosh prokuraturadan Qoraqalpog‘iston voqealari yuzasidan ba’zi fuqarolarning qamoq ehtiyot chorasini yengilrog‘iga almashtirish so‘ralgandi. Oliy Majlisning Inson huquqlari bo‘yicha vakili (ombudsman) matbuot xizmati gumonlanuvchilarning 24 nafari jamoat kafilligi asosida o‘z oilasiga qaytarilganini ma’lum qildi.
Qayd etilishicha, Bosh prokuratura tomonidan Qoraqalpog‘istonda bo‘lib o‘tgan voqealarni mustaqil ravishda o‘rganayotgan Komissiya a’zolari taklifi va Jo‘qorg‘i Kengesi iltimosnomasiga ko‘ra, 24 nafar gumonlanuvchini jamoat kafilligi asosida o‘z oilasiga qaytarildi. Ularga nisbatan belgilangan qamoq ehtiyot chorasi insonparvarlik tamoyili asosida jamoatchilik nazorati va uy qamog‘i tarzidagi ehtiyot chorasiga almashtirildi.
Bunda ushbu fuqarolarning Qoraqalpog‘istonda bo‘lib o‘tgan voqealarda sodir etgan qilmishlaridan pushaymon ekani, qaramog‘ida voyaga yetmagan farzandlari borligi, shuningdek oilaviy sharoiti og‘ir ekani, ba’zi shaxslarning oilada yolg‘iz boquvchi bo‘lgani e’tiborga olingan.
“Komissiya a’zolari o‘z faoliyatini boshlaganidan buyon fuqarolar murojaatlarini o‘rganishga alohida e’tibor qaratmoqda. Har bir murojaat darhol o‘rganilib, tegishli choralar ko‘rilmoqda. Bugun 24 nafar gumonlanuvchining jamoat kafilligi asosida o‘z oilasiga qaytarilishi ham ushbu say-harakatlarning natijasidir”, — deyiladi xabarda.
Eslatib o‘tamiz, bo‘lib o‘tgan voqealarni har tomonlama chuqur va xolisona tergov qilish bo‘yicha tergov jarayonlari davom etmoqda.
Izoh (0)