“O‘zbekneftgaz”: “Uzbekistan GTL” zavodining uzluksiz ish rejimiga o‘tilayotgani ortidan mahsulotlar tannarxini kamaytirilishiga erishilmoqda

“Uzbekistan GTL” zavodida joriy yil iyun oyidan mintaqada birinchi sintetik suyuq mahsulotlarni ishlab chiqarish yo‘lga qo‘yildi.

Joriy yil iyul oyidan boshlab ichki iste’molchilarga yuqori sifatli, K-6 ekologik sinfiga mansub, Yevro 6 talablariga to‘liq javob beradigan sintetik dizel yonilg‘isi Tovar xom-ashyo birjasi orqali realizatsiya qilinmoqda. Bugungi kunga qadar birja savdolari orqali iste’molchilarga 35 ming tonnadan ortiq sintetik dizel yonilg‘isi 1 tonnasi 15,5 million so‘mdan 18,9 million so‘mgacha sotildi va o‘z vaqtida yetkazib berildi.

Sintetik dizel yoqilg‘isi “Navoiy kon-metallurgiya kombinati” AJ, “Olmaliq kon-metallurgiya kombinati” AJ, “Navoiyuran” DK, “O‘zbekiston temir yo‘llari” AJ, “Ohangaronsement” AJ, respublikadagi barcha neft bazalar, yirik agroklasterlar, qurilish tashkilotlari va bir qator xususiy tadbirkorlar tomonidan doimiy ravishda xarid qilinmoqda va iste’molchilar tomonidan yuqori baholanmoqda.

“Uzbekistan GTL” zavodida sinov rejimidan to‘liq ish rejimiga o‘tish ishlari boshlangani sababli mahsulot ishlab chiqarish hajmlari bosqichma-bosqich ortmoqda. Iyun oyida bir kunda 800 tonna sintetik dizel ishlab chiqarilgan bo‘lsa, sentyabr oyida ushbu ko‘rsatgich 1 ming 400 tonnagacha ortishi kutilmoqda. Ishlab chiqarish hajmlarini oshirish orqali mahsulot tannarxini kamaytirilishiga erishilmoqda.

Mahsulot ishlab chiqarish hajmlarining ortishini respublikamiz yoqilg‘i mustaqilligiga yana bir katta qadam sifatida e’tirof etishimiz mumkin.

“Uzbekistan GTL” zavodi ichki iste’molchilarga yuqori sifatli dizel yonilg‘isini past narxlarda yetkazib berishni ta’minlash maqsadida O‘zbekiston Respublikasi mustaqilligining 31 yilligi bayrami arafasida joriy yil 29-avgustdan boshlab Tovar xom-ashyo birjasi orqali sotuvga chiqariladigan sintetik dizel yonilg‘isini 1 tonnasi boshlang‘ich narxi 14 million 504 ming 378 so‘mgacha arzonlashtirilishi belgilandi.

Kelgusida zavod tomonidan ishlab chiqariladigan mahsulot hajmlari ortishi natijasida ularning tannarxi va mos ravishda birja savdolariga qo‘yiladigan boshlang‘ich narxlari ham bosqichma-bosqich pasayib borishiga erishiladi.

“O‘zbekneftgaz” AJ Matbuot xizmati