Ijtimoiy tarmoqlarda “Navoiyazotdan chiqayotgan tutunlarning kuchayganlik ehtimoli yuqori. Navoiy xalqining sog‘lig‘i uchun qayg‘urib, chiqayotgan tutunni tekshiradigan hech kim yo‘qmi?” sarlavhasi ostida xabar tarqaldi. Viloyat ekologiya boshqarmasi holat yuzasidan o‘rganish ishlarini olib bordi.
Ta’kidlanishicha, xabar yuzasidan 26-avgust kuni soat 23:10 da Navoiy shahri ekologiya bo‘limi davlat inspektorlari hamda Atrof-muhit ifloslanishini monitoring qilish bo‘limlari xodimlari tomonidan “Navoiyazot” AJda hamda “Navoiy Milling” MCHJ korxonalarining atrofidan “Gazanalizator” EKOLAB uskunalar orqali (vizual) atmosfera havosidan namunalar olinib o‘rganildi.
Birinchidan, “Navoiyazot” AJning sinov uchun o‘rnatilgan superfosfat ishlab chiqarish sexi “Tabiatni muhofaza qilish to‘g‘risida”gi qonun va qonunosti hujjatlari talablariga javob bermagani, aholining haqli e’tiroziga sabab bo‘lgani uchun zavod tomonidan faoliyati to‘xtatilgani aniqlandi.
Shuningdek, “Navoiyazot”AJning ishlab chiqarish sexlaridan chiqayotgan zararli gazlar yangi texnologiyalar joriy qilingani natijasida keyingi ikki yilda oldingiga nisbatan sezilarli kamaygani, korxona viloyat ekologiya boshqarmasi ko‘rsatmalariga asosan atmosfera havosiga tashlanayotgan zararli gazlarni kamaytirish yuzasidan chora-tadbirlar bosqichma-bosqich bajarilayotgani ma’lum bo‘ldi.
Ikkinchidan, o‘rganish davomida “Navoiy Milling” MCHJ korxonasidan atrof-muhitga me’yoridan yuqori ifloslantiruvchi moddalar tashlayotgani aniqlanib, 26-avgustdan 27-avgustga o‘tar kechasi korxonaning yuqori ishlash hajmi konsentratsiyasi pasaytirilib, atmosfera havosiga tashlanayotgan tashlamalar bo‘yicha holat bartaraf etildi. Viloyat ekologiya boshqarmasi “Navoiy Milling” MCHJ korxonasida “Tabiatni muhofaza qilish to‘g‘risida”gi qonun va qonunosti hujjatlarning bajarilishi bo‘yicha tegishli organning ruxsatiga asosan tekshirish o‘tkazishini ma’lum qildi.
Izoh (0)