Buxoro viloyatining Romitan tumani Quyi Mirishkor qishlog‘idagi xonadonda gaz balloni portlab, yong‘in sodir bo‘ldi, deya xabar berdi “Daryo” muxbiri.
Hududda yashovchi fuqaroning bildirishicha, portlash ovozi juda vahimali eshitilgan.
“Qo‘rqib uyg‘onib ketdik. Sergaklik bilan ko‘chaga otildik. Qishloqdoshimizning xonadonida gaz balloni portlab, uyi yonib ketayotganiga guvoh bo‘ldik. Tom qismi uchib ketgan va boshqa xonadonlarga ziyon yetkazmagan bo‘lsa-da, yong‘in uchquni ularning ham hovlisiga uchib tushayotgandi. Qishloq odamlari chelakda suv, qum tashib, yordamga otildik”, — deydi shu qishloqda yashovchi yigit.
Fuqaroning bildirishicha, yong‘in xonadonga juda katta zarar yetkazgan.
“Xonadon vakillaridan biri yarim tunda oshxonaga kirganda, chiroqni yoqqan. Va kutilmaganda falokat yuz bergan. Uy-joy, mol-mulklari yonib ketdi. Allohga shukur, o‘zlariga ziyon yetmabdi. Jonlari sog‘”, — deydi suhbatdosh.
“Daryo” muxbiri holatga aniqlik kiritish maqsadida viloyat Favqulodda vaziyatlar boshqarmasi axborot xizmati rahbari Mirjon Fayzullayev bilan telefon orqali bog‘langan.
“Joriy yilning 27-avgust kuni soat 00:05 da Romitan tumanidagi ‘Attaron’ MFY, Qo‘yimirishkor qishlog‘ida yong‘in sodir bo‘layotgani to‘g‘risida Romitan tuman FVBga xabar kelib tushdi. Xabar yuzasidan fuqaroning yashash xonadoniga 3 ta yong‘in qutqaruv avtoekipaji jalb etildi. Ushbu ekipaj manzilga soat 00:20 da yetib bordi. Bu paytgacha esa xonadonning 81 kv/metr maydonining tom qismi va uy jihozlari yonib ketgani aniqlandi. Yong‘in 01:40 da to‘liq bartaraf etildi”, — dedi Mirjon Fayzullayev.
Dastlabki ma’lumotlarga ko‘ra, fuqarolarning kuyish va halok bo‘lishi holatlari qayd etilmagan.
Izoh (0)