«Uzbekistan GTL» заводида жорий йил июнь ойидан минтақада биринчи синтетик суюқ маҳсулотларни ишлаб чиқариш йўлга қўйилди.
Жорий йил июль ойидан бошлаб ички истеъмолчиларга юқори сифатли, К-6 экологик синфига мансуб, Евро 6 талабларига тўлиқ жавоб берадиган синтетик дизель ёнилғиси Товар хом-ашё биржаси орқали реализация қилинмоқда. Бугунги кунга қадар биржа савдолари орқали истеъмолчиларга 35 минг тоннадан ортиқ синтетик дизель ёнилғиси 1 тоннаси 15,5 миллион сўмдан 18,9 миллион сўмгача сотилди ва ўз вақтида етказиб берилди.
Синтетик дизель ёқилғиси «Навоий кон-металлургия комбинати» АЖ, «Олмалиқ кон-металлургия комбинати» АЖ, «Навоиюран» ДК, «Ўзбекистон темир йўллари» АЖ, «Оҳангаронцемент» АЖ, республикадаги барча нефть базалар, йирик агрокластерлар, қурилиш ташкилотлари ва бир қатор хусусий тадбиркорлар томонидан доимий равишда харид қилинмоқда ва истеъмолчилар томонидан юқори баҳоланмоқда.
«Uzbekistan GTL» заводида синов режимидан тўлиқ иш режимига ўтиш ишлари бошлангани сабабли маҳсулот ишлаб чиқариш ҳажмлари босқичма-босқич ортмоқда. Июнь ойида бир кунда 800 тонна синтетик дизель ишлаб чиқарилган бўлса, сентябр ойида ушбу кўрсатгич 1 минг 400 тоннагача ортиши кутилмоқда. Ишлаб чиқариш ҳажмларини ошириш орқали маҳсулот таннархини камайтирилишига эришилмоқда.
Маҳсулот ишлаб чиқариш ҳажмларининг ортишини республикамиз ёқилғи мустақиллигига яна бир катта қадам сифатида эътироф этишимиз мумкин.
«Uzbekistan GTL» заводи ички истеъмолчиларга юқори сифатли дизель ёнилғисини паст нархларда етказиб беришни таъминлаш мақсадида Ўзбекистон Республикаси мустақиллигининг 31 йиллиги байрами арафасида жорий йил 29 августдан бошлаб Товар хом-ашё биржаси орқали сотувга чиқариладиган синтетик дизель ёнилғисини 1 тоннаси бошланғич нархи 14 миллион 504 минг 378 сўмгача арзонлаштирилиши белгиланди.
Келгусида завод томонидан ишлаб чиқариладиган маҳсулот ҳажмлари ортиши натижасида уларнинг таннархи ва мос равишда биржа савдоларига қўйиладиган бошланғич нархлари ҳам босқичма-босқич пасайиб боришига эришилади.
«Ўзбекнефтгаз» АЖ Матбуот хизмати
Изоҳ (0)