АҚШнинг Флорида штати, Пенсакола шаҳрида талаба қиз яшин уришидан кейин тирик қолди. Бу ҳақда Daily Mail хабар бермоқда.
18 ёшли Эмма Эгглер ўқишнинг илк кунида Ғарбий Флорида университетига кетаётган пайт, кутилмаганда уни яшин урган. Яшин қизнинг кўксига тегган, оқибатда қиз ерга йиқилган.
Зарба шунчалик кучли бўлганидан қизнинг соати портлаб, эгнидаги свитери ёниб кетган, пайпоғи ва этигида тешиклар пайдо бўлган. Воқеадан кейин талаба бир муддат юра олмаган.
Эгглерга яқин атрофдаги университет ходимлари ва талабалар ёрдамга келган. Талаба касалхонага ётқизилган. Шифокорларнинг таъкидлашича, қизнинг тирик қолиши жуда омадли ҳодиса. Яшин унинг танаси чап томонини ва оёқларини урган.
«Мен ҳеч нарсани ҳис қилмадим, кўзимни очганимда ерда ётгандим. Шифокорлар менга лотерея чиптаси сотиб олишни маслаҳат берди, чунки мен жуда омадли эканман», — дейди Эгглер.
Бир кун ўтиб талаба касалхонадан чиқарилди. Бу вақтга келиб, унда оёқларнинг сезгирлиги ва ҳаракат қобилияти тикланди. Талаба кейинги ҳафта ўқишга қайтишни режалаштирмоқда.
Изоҳ (0)