Yadro qurolini tarqatmaslik haqidagi shartnoma (YaQTSh) anjumanida yakuniy hujjat haqida kelishib olishga muvaffaq bo‘linmadi, deb yozadi “RBK”. Bu haqda konferensiya raisi Gustavo Zlauvinen e’lon qilgan.
Uning so‘zlariga ko‘ra, ishtirokchilar hujjat mundarijasi bo‘yicha konsensusga kelmagan, balki uning protsedura qisminigina kelishib olgan, unga muvofiq, keyingi konferensiya 2026-yilda o‘tkaziladi.
Rossiya Tashqi ishlar vazirligi qurol-yarog‘ tarqatmaslik va uning ustidan nazorat masalalari bo‘yicha departamenti direktori o‘rinbosari Igor Vishnevetskiy ma’lum qilishicha, hujjat matniga nisbatan noroziliklar ko‘pchilik delegatsiyalarda bo‘lgan, Rossiya delegatsiyasi noroziliklari esa asosiylaridir. Ular “oshkora siyosiy xususiyatga ega” bandlarga tegishli. “Biz so‘nggi marta urinib ko‘rdik, ushbu bandlarni o‘zgartirishni taklif qildik”, — dedi u va Rossiya tomonining iltimosi qondirilmaganini qo‘shib qo‘ydi.
Rossiyaning Jenevadagi BMT bo‘linmasidagi doimiy vakili o‘rinbosari Andrey Belousov ma’lum qilishicha, konsensusga erishilmaganiga o‘zaro zid nuqtai nazarga ega davlatlarning bir-birining fikrlarini inobatga olishni istamasligi hamda Rossiya harbiy operatsiya olib borayotgan Ukraina bo‘yicha ba’zi delegatsiyalarning “siyosiy tusga ega, noxolis, asossiz va yolg‘on” bayonotlari ham sabab bo‘lgan. Ammo, diplomat qayd etishicha, yakuniy hujjatning yo‘qligi konferensiya muvaffaqiyatsizlikka uchraganini bildirmaydi.
YaQTSh amal qilishini ko‘rib chiqish bo‘yicha 10-konferensiya 1-avgustdan buyon Nyu-Yorkda o‘tkazilayotgan edi, muhokama mavzularidan biri Zaporojye AESdagi vaziyat bo‘ldi. Ukrainadagi jangovar harakatlar boshidan buyon u Rossiya nazorati ostida turibdi; tomonlar bir-birini AES hududini o‘qqa tutishda ayblamoqda.
YaQTSh 1970-yil 5-mart kuni kuchga kirgan bo‘lib, uni 191 ta mamlakat imzolagan. Yadro quroliga ega bo‘lmagan davlatlar uni ishlab chiqarmaslik va sotib olmaslik majburiyatini o‘z zimmasiga olgan. Yadro quroli bo‘lgan mamlakatlar esa boshqa davlatlarni uni ishlab chiqarish yoki sotib olishga undamaslikka va yordam bermaslikka va’da bergan.
Konferensiyaning yakuniy hujjatlari shartnomaning yana besh yilga uzaytirilishini tasdiqlardi, ammo 1995-yilda bitim muddatsiz tarzda uzaytirildi. Hozir yakuniy hujjat majburiy yuridik kuchga ega emas. 2015-yilda o‘tkazilgan avvalgi konferensiyada ham yakuniy hujjat haqida kelishib olinmagan edi.
Izoh (0)