Pensiya jamg‘armasi tizimida 2022-yil 1-yarimyillikda aniqlangan moliyaviy xatoliklar va ularning profilaktikasi bo‘yicha amalga oshirilayotgan ishlar sarhisobi e’lon qilindi.
Qayd etilishicha, bugungi kunda Pensiya jamg‘armasi tomonidan 4,2 million nafar fuqaroga har oyda pensiya va nafaqa to‘lovlari uchun oylik talabnomalarning o‘z vaqtida moliyalashtirilishi hamda oyma-oy to‘liq to‘lanishi ta‘minlanib, bu maqsadlarga jamg‘arma va Respublika budjeti hisobidan har oyda mablag‘lar xarajat qilinmoqda. Bundan tashqari, Pensiya jamg‘armasi orqali 2,2 million nafar kam ta’minlangan oilaga bolalar nafaqasi va moddiy yordam to‘lanishi tashkil etilmoqda.
2022-yilning o‘tgan olti oyi davomida 200,4 ming nafar fuqaroga yangi pensiya va nafaqalar, 1 million 394 ming nafar oilaga bolalar nafaqasi va moddiy yordam tayinlangan.
Pensiya jamg‘armasi Ijro etuvchi apparatining Ichki audit xizmati tomonidan 2022-yilning I yarim yilligida o‘tkazilgan barcha o‘rganishlar va nazorat tadbirlarida jami 3292 ta holatda 5 milliard 718,3 million so‘mlik moliyaviy xatoliklar va ortiqcha pensiya (nafaqa) to‘lovlari aniqlangan. Bu xatoliklar quyidagi yo‘nalishlarda yo‘l qo‘yilgan:
- “Ijtimoiy himoya yagona reyestri” axborot tizimi orqali kam ta’minlangan oilalarga bolalar nafaqasi va moddiy yordam tayinlash uchun ma’lumotlarni noto‘g‘ri shakllanishi oqibatida 2194 holatda 3 milliard 510,3 million so‘m;
- Pensiya va nafaqalarining noto‘g‘ri tayinlanishi va hisoblanishi oqibatida 913 holatda 2 milliard 179,7 million so‘m;
- Hududlarda buxgalteriya hisobini yuritishda smeta-shtat va budjet intizomining buzilishi million 185 holatda 28,2 million so‘m.
Prezidentning 2022-yil 29-apreldagi “Ijtimoiy himoyaga muhtoj aholi qatlamlarini moddiy qo‘llab-quvvatlashga doir qo‘shimcha chora-tabdirlar to‘g‘risida”gi farmoniga muvofiq, 2022-yil 1-aprelga qadar nafaqa va moddiy yordam tayinlash uchun ma’lumotlarning xato taqdim etilishi, kiritilishi va texnik sabablar tufayli ortiqcha to‘langan summalar hisobdan chiqarilib, fuqarolardan undirilishi bekor qilingan.
Davlat pensiyalarini tayinlashda esa aniqlangan ortiqcha to‘lovlar quyidagi sabablarga ko‘ra yuzaga kelgan:
- fuqarolarning haqiqatda ishlamagan davrini ish staji sifatida qabul qilinishi oqibatida 310 holatda 1 milliard 81 million so‘m;
- fuqarolarning ish haqi to‘g‘risidagi ma’lumotlari noto‘g‘ri hisoblanishi oqibatida 354 holatda 382 million so‘m;
- Arxiv idoralari, korxona va tashkilotlar tomonidan noto‘g‘ri ma’lumotnomalar taqdim etilishi oqibatida 52 holatda 181 million so‘m;
- fuqarolarga imtiyozli shartlarda yoshga doir pensiyalar tayinlashda imtiyozli ish stajlarini noto‘g‘ri inobatga olinishi natijasida 10 holatda 148 million so‘m ortiqcha to‘lovlarga yo‘l qo‘yilgan.
Izoh (0)