Пенсия жамғармаси тизимида 2022 йил 1-яримйилликда аниқланган молиявий хатоликлар ва уларнинг профилактикаси бўйича амалга оширилаётган ишлар сарҳисоби эълон қилинди.
Қайд этилишича, бугунги кунда Пенсия жамғармаси томонидан 4,2 миллион нафар фуқарога ҳар ойда пенсия ва нафақа тўловлари учун ойлик талабномаларнинг ўз вақтида молиялаштирилиши ҳамда ойма-ой тўлиқ тўланиши таъминланиб, бу мақсадларга жамғарма ва Республика бюджети ҳисобидан ҳар ойда маблағлар харажат қилинмоқда. Бундан ташқари, Пенсия жамғармаси орқали 2,2 миллион нафар кам таъминланган оилага болалар нафақаси ва моддий ёрдам тўланиши ташкил этилмоқда.
2022 йилнинг ўтган олти ойи давомида 200,4 минг нафар фуқарога янги пенсия ва нафақалар, 1 миллион 394 минг нафар оилага болалар нафақаси ва моддий ёрдам тайинланган.
Пенсия жамғармаси Ижро этувчи аппаратининг Ички аудит хизмати томонидан 2022 йилнинг I ярим йиллигида ўтказилган барча ўрганишлар ва назорат тадбирларида жами 3292 та ҳолатда 5 миллиард 718,3 миллион сўмлик молиявий хатоликлар ва ортиқча пенсия (нафақа) тўловлари аниқланган. Бу хатоликлар қуйидаги йўналишларда йўл қўйилган:
- «Ижтимоий ҳимоя ягона реестри» ахборот тизими орқали кам таъминланган оилаларга болалар нафақаси ва моддий ёрдам тайинлаш учун маълумотларни нотўғри шаклланиши оқибатида 2194 ҳолатда 3 миллиард 510,3 миллион сўм;
- Пенсия ва нафақаларининг нотўғри тайинланиши ва ҳисобланиши оқибатида 913 ҳолатда 2 миллиард 179,7 миллион сўм;
- Ҳудудларда бухгалтерия ҳисобини юритишда смета-штат ва бюджет интизомининг бузилиши миллион 185 ҳолатда 28,2 миллион сўм.
Президентнинг 2022 йил 29 апрелдаги «Ижтимоий ҳимояга муҳтож аҳоли қатламларини моддий қўллаб-қувватлашга доир қўшимча чора-табдирлар тўғрисида»ги фармонига мувофиқ, 2022 йил 1 апрелга қадар нафақа ва моддий ёрдам тайинлаш учун маълумотларнинг хато тақдим этилиши, киритилиши ва техник сабаблар туфайли ортиқча тўланган суммалар ҳисобдан чиқарилиб, фуқаролардан ундирилиши бекор қилинган.
Давлат пенсияларини тайинлашда эса аниқланган ортиқча тўловлар қуйидаги сабабларга кўра юзага келган:
- фуқароларнинг ҳақиқатда ишламаган даврини иш стажи сифатида қабул қилиниши оқибатида 310 ҳолатда 1 миллиард 81 миллион сўм;
- фуқароларнинг иш ҳақи тўғрисидаги маълумотлари нотўғри ҳисобланиши оқибатида 354 ҳолатда 382 миллион сўм;
- Архив идоралари, корхона ва ташкилотлар томонидан нотўғри маълумотномалар тақдим этилиши оқибатида 52 ҳолатда 181 миллион сўм;
- фуқароларга имтиёзли шартларда ёшга доир пенсиялар тайинлашда имтиёзли иш стажларини нотўғри инобатга олиниши натижасида 10 ҳолатда 148 миллион сўм ортиқча тўловларга йўл қўйилган.
Изоҳ (0)