AQSH nodavlat tashkiloti Qoraqalpog‘istonga tibbiy buyumlar va jihozlarning navbatdagi turkumini yetkazib berishni rejalashtirmoqda. Bu haqda “Dunyo” axborot agentligi xabar berdi.
Qayd etilishicha, insonparvarlik yordamining navbatdagi turkumini Qoraqalpog‘istonga yetkazishning amaliy jihatlarini muhokama qilish maqsadida O‘zbekiston elchisi Javlon Vahobov Amerikaning “Project C.U.R.E.” xayriya tashkiloti direktori Melissa Esposti bilan uchrashgan. Gumanitar yordam tarkibi Qoraqalpog‘iston sog‘liqni saqlash organlariga topshirish uchun tibbiy buyumlar va jihozlardan iborat bo‘ladi.
Uchrashuvda Amerika tomoni “Project C.U.R.E.” Orol dengizining qurishi oqibatlaridan jabr ko‘rgan Qoraqalpog‘iston aholisiga insonparvarlik yordamini ko‘rsatishni davom ettirish niyatini ma’lum qildi. Melissa Espostining aytishicha, bugungi kunga qadar umumiy qiymati 1,5 million dollarlik tibbiy asbob-uskunalardan iborat beshta konteyner yetkazib berilgan bo‘lib, ulardan Qoraqalpog‘istondagi texnik jihozlarga juda muhtoj bo‘lgan tibbiyot muassasalari foydalanmoqda. Tashkilot vakilining ma’lumotlariga ko‘ra, 2022-yil oxiriga qadar tashkilot insonparvarlik yordamining navbatdagi turkumini Qoraqalpog‘istonga yetkazish rejalashtirilmoqda.
Melissa Esposti Orol dengizi mintaqasidagi vaziyatni yaxshilash uchun tashkilot loyihasi bilan bir qatorda AQSHdan donorlarni jalb qilishga yordam berishga tayyor ekanini ham ma’lum qildi. Uning aytishicha, Orol dengizi ekotizimini tiklash va to‘g‘ri boshqarish mintaqa atrof-muhitini barqaror rivojlantirishning garovidir. Shu munosabat bilan Markaziy Osiyo davlatlari sa’y-harakatlarini birlashtirish, shuningdek, mahalliy va xorijiy hamjamiyat, hamkorlar va donorlarning faol ishtirokini ta’minlash orqali Orol dengizini tiklash bo‘yicha qat’iy qadamlar qo‘yilishi zarur.
O‘zbekiston elchixonasi ma’lumotlariga ko‘ra, avval O‘zbekistonning AQSHdagi elchisi Javlon Vahobov va tashkilot prezidenti Duglas Jekson o‘rtasida Qoraqalpog‘istonga 3 million dollarlik tibbiy asbob-uskunalar va sog‘liqni saqlash buyumlarini yetkazib berish bo‘yicha erishilgan kelishuv doirasida 2021-yil may oyida tibbiy buyumlar va jihozlardan iborat birinchi konteyner mintaqa sog‘liqni saqlash idoralariga yuborilgan. 2022-yilning iyul oyida esa umumiy hajmi 16,8 tonna bo‘lgan, 2,9 ming dona tibbiyot buyumlari jamlangan to‘rtta konteyner yetkazib berilgan.
Izoh (0)