Hindiston–Markaziy Osiyo biznes kengashi doirasida O‘zbekiston–Hindiston energetika sohasidagi hamkorlik istiqbollari muhokama qilindi, deb xabar qilmoqda “Dunyo”.
Ma’lum qilinishicha, Hindiston Savdo-sanoat palatalari federatsiyasi tomonidan Hindiston–Markaziy Osiyo biznes kengashi doirasida energetika sohasidagi hamkorlikka bag‘ishlangan vebinar bo‘lib o‘tgan. Onlayn tadbirda Hindiston Savdo-sanoat palatalari federatsiyasi, Tashqi ishlar vazirligi, Yangi va qayta tiklanadigan energiya vazirligi, Markaziy Osiyo Savdo-sanoat palatalari, energetika vazirliklari mutasaddilari va Markaziy Osiyo mamlakatlarining Hindistondagi elchixonalari, 50 ga yaqin turli kompaniya vakillari ishtirok etgan.
O‘zbekistonning Hindistondagi elchisi Dilshod Ahatov tomonidan respublikada energetika sohasida amalga oshirilayotgan islohotlar, jumladan, qayta tiklanuvchi energiya manbalarini rivojlantirish bo‘yicha hayotga tatbiq etilayotgan loyihalar haqidagi ma’lumot taqdim etildi.
Hindistonning qayta tiklanuvchi energiya manbalari sohasidagi tajribasini inobatga olingan holda hind tomoni O‘zbekistonda quyosh modullari, energiyani saqlash uchun akkumulyatorlar va boshqa qayta tiklanuvchi energiya tizimlarini ishlab chiqarish bo‘yicha qo‘shma loyihalarni amalga oshirishda hamkorlikni faollashtirishga chaqirildi.
Ishtirokchilar energetika sohasini rivojlantirish yo‘lida olib borilayotgan keng qamrovli islohotlar, xorijiy sarmoyadorlar uchun yaratilgan qulay shart-sharoitlarni yuqori baholab, ishbilarmonlarning O‘zbekiston bilan hamkorlik aloqalarini yanada chuqurlashtirishga qiziqishi tobora ortib borayotganini ta’kidladi.
Izoh (0)