YCHL guruh bosqichida 27 yil deganda ilk bor Turkiya jamoalari ishtirok etmaydi

UEFA Chempionlar Ligasi 2022/23-yilgi mavsum guruh bosqichida birorta turk klubi ishtirok etmaydi.

Turkiya vitse-chempioni “Fenerbahche” ikkinchi saralash bosqichida Kiyevning “Dinamo”siga mag‘lub bo‘ldi. Ukrainaliklar 0:0 hisobidagi durangdan so‘ng Istambulda 2:1 hisobida g‘alaba qozondi. Qo‘shimcha daqiqalarda hal qiluvchi golni Kiyev jamoasi himoyachisi Aleksandr Karavayev urdi.

Mamlakat chempioni “Trabzonspor” guruh bosqichiga chiqishi uchun saralash pley-offidan o‘tishi kerak edi. Raqibi “Kopengagen” bo‘lgan Turkiya jamoasi Daniya poytaxtida 1:2 hisobida mag‘lub bo‘ldi, javob o‘yinida esa jamoalar nursiz durang qayd etdi.

So‘nggi bor 1995/96-yilgi mavsum Chempionlar Ligasi guruh bosqichida birorta Turkiya klubi ishtirok etmagandi. 1995-yil avgust oyida Turkiya chempioni “Beshiktosh” Norvegiyaning “Rusenborg” jamoasiga ikki o‘yinda ham mag‘lub bo‘lib, YCHL saralashidan o‘ta olmagandi.

Qiziqarlisi, 2022/23-yilgi Chempionlar Ligasi finali Istambulda bo‘lib o‘tadi. Hal qiluvchi o‘yin 10-iyun sanasiga belgilangan. Uchrashuv “Otaturk Olimpiya Stadioni”da o‘tkaziladi.