Ijtimoiy tarmoqlarda “Namangan viloyatida noma’lum shaxslar tomonidan poyezd relsiga bog‘lab ketilgan bir ayolning ikkiga bo‘lingan jasadi topilgan” nomli xabar e’lon qilindi. Transport prokuraturasi holat yuzasidan rasmiy ma’lumot berdi.
Aniqlanishicha, ushbu holat 2021-yil Sirdaryo viloyatida yuz bergan va holat yuzasidan Xovos transport prokuraturasi tomonidan qonuniy qaror qabul qilingan. Bugungi kunda e’lon qilingan xabardagi ma’lumotlar haqiqatga to‘g‘ri kelmaydi.
Ma’lumot uchun, 2021-yil 24-may kuni soat 13:30 da Sirdaryo viloyati IIB TXTB navbatchilik qismiga Xovos—Toshkent yo‘nalishidagi yo‘lovchi elektropoyezdi Xovos aylanma yo‘lining 2-kilometri 6-piketida 25-30 yoshlar atrofidagi shaxsi noma’lum ayolni urib yuborgani haqida xabar kelib tushgan.
Olib borilgan tezkor surishtiruv ishlari natijasida ushbu ayol 1999-yilda tug‘ilgan, Xovos tumani “Gulbahor” MFYda yashagan T.Sh. ekani hamda o‘zining ehtiyotsizligi oqibatida elektropoyezd urib yuborgani aniqlangan. Ayol olgan tan jarohatlari oqibatida voqea joyida halok bo‘lgan.
Bosh prokuratura matbuot xizmatining ma’lum qilishicha, holat yuzasidan Xovos transport prokuraturasi tomonidan tergovga qadar tekshiruv harakatlari olib borilgan.
Izoh (0)