Ijtimoiy tarmoqlarda Sirdaryo viloyatining Xovos tumanida poyezd ayolni ikkiga bo‘lib yuborgani haqida xabarlar tarqaldi. IIV Transportda xavfsizlikni ta’minlash bosh boshqarmasi holat yuzasidan rasmiy ma’lumot berdi.
Ma’lum qilinishicha, 24-may kuni soat 13:30 larda Sirdaryo viloyati IIB TXTB navbatchilik qismiga Xovos—Toshkent yo‘nalishidagi yo‘lovchi elektropoyezdi Xovos aylanma yo‘lining 2-kilometri 6-piketida 25-30 yoshlar atrofidagi shaxsi noma’lum ayol kishini urib yuborgani haqida xabar kelib tushgan.
Olib borilgan tezkor surishtiruv ishlari natijasida ushbu ayol 1999-yilda tug‘ilgan, Xovos tumani “Gulbahor” MFYda yashagan T.Sh. ekanligi hamda o‘zining ehtiyotsizligi oqibatida elektropoyezd urib yuborganligi aniqlangan.
Ayol olgan tan jarohatlari oqibatida voqea joyida vafot etgan.
Bosh prokuratura matbuot xizmatining ma’lum qilishicha, holat yuzasidan Xovos transport prokuraturasi tomonidan tergovga qadar tekshiruv harakatlari olib borilmoqda.
Avvalroq Namanganda naushnik taqib, temiryo‘l bo‘ylab harakatlangan 19 yoshli yigitni poyezd urib ketgani, Toshkent shahridagi “Yalang‘och” va “Salar” temiryo‘l stansiyalari oralig‘ida naushnikda qo‘shiq eshitib ketayotgan 10-sinfida o‘qiydigan qizni poyezd urib yuborgani, Toshkent viloyatida naushnik taqib, temiryo‘l bo‘ylab harakatlangan ikki ayolni poyezd urib ketgani va ulardan biri voqea joyida vafot etgani to‘g‘risida xabar berilgandi.
Izoh (0)