Minsk shahrida 24-avgust kuni O‘zbekiston Respublikasi va Belarus Respublikasi o‘rtasida ikki tomonlama hamkorlik bo‘yicha Qo‘shma Hukumatlararo komissiyaning 9-yig‘ilishi bo‘lib o‘tdi. Bu haqda Investitsiyalar va tashqi savdo vazirligi xabar qildi.
Qayd etilishicha, yig‘ilishga vazir Jamshid Xo‘jayev va Belarus bosh vazirining o‘rinbosari Leonid Zayats hamraislik qilgan. Tadbirda ikki mamlakatning asosiy vazirlik va idoralari rahbarlari ham ishtirok etgan. Yig‘ilish kun tartibi doirasida investitsiyaviy, savdo-iqtisodiy, sanoat, ilmiy-texnik va madaniy-gumanitar hamkorlikning keng ko‘lamli masalalari ko‘rib chiqilgan.
Ikki davlat rahbarlarining sa’y-harakatlari tufayli O‘zbekiston va Belarus o‘rtasidagi munosabatlar yuqori va barqaror rivojlanish dinamikasi bilan ajralib turishi va bu, o‘z navbatida, ustuvor yo‘nalishlarda hamkorlikni chuqurlashtirish uchun zarur shart-sharoitlarni yaratishi ta’kidlangan.
Investitsiyalar sohasidagi hamkorlik va sanoat kooperatsiyasini rivojlantirishning ijobiy tendensiyalari muhokama qilingan. So‘nggi uch yil ichida O‘zbekistonda Belarus kapitali ishtirokidagi korxonalar soni to‘rt barobarga oshib, 157 tani tashkil etgan. Joriy yilning atigi yetti oyida 58 ta korxona tashkil etilgan. O‘z navbatida, Belarusda o‘zbek kapitali ishtirokidagi 101 ta korxona faoliyat ko‘rsatmoqda. Mashinasozlik, to‘qimachilik, oziq-ovqat, farmatsevtika sanoati, elektronika va qurilish materiallari ishlab chiqarish sohalarida yuqori qo‘shilgan qiymatga ega mahsulotlar ishlab chiqarish va keyinchalik ularni ikki davlatning logistika imkoniyatlaridan foydalangan holda uchinchi mamlakatlarga eksport qilish bo‘yicha hamkorlikda yangi qo‘shma loyihalarni amalga oshirishning katta istiqbollari qayd etilgan. Sanoat kooperatsiyasi sohasida hamkorlikning yangi yo‘nalishlari va qo‘shma tashabbuslarni ishlab chiqish maqsadida shu yilning sentabr oyida Toshkent shahrida O‘zbekiston—Belarus biznes Kengashining ikkinchi yig‘ilishini o‘tkazishga kelishilgan.
IT va innovatsiyalar sohasidagi hamkorlik masalalari bo‘yicha fikr almashilgan. Belarusda 2023-yilning birinchi yarmida fan va texnologiyalar sohasidagi hamkorlik bo‘yicha Belarus—O‘zbekiston komissiyasining 2-yig‘ilishini qatnashchilarning bevosita ishtirokida o‘tkazish, shuningdek, tasdiqlangan qo‘shma Ilmiy-texnikaviy va innovatsion hamkorlik dasturini IT, raqamlashtirish va yuqori texnologiyalar sohasidagi yangi tashabbus va loyihalar bilan boyitish to‘g‘risida kelishuvga erishilgan.
Madaniy-gumanitar hamkorlikka, xususan, ta’lim va turizmni rivojlantirish sohasidagi munosabatlarga alohida e’tibor qaratilgan. Belarus fuqarolari uchun “Oila uchun turizm”, “Quyoshli ta’til”, “Vitaminli tur”, “O‘qish va sayohat” kabi maxsus turistik xizmatlarini tashkil etishga tayyorlik bildirilgan. Belaruslik mutaxassislar joriy yilning noyabr oyida bo‘lib o‘tadigan Toshkent xalqaro turizm yarmarkasi va 2023-yilda Samarqand shahrida o‘tkazilishi rejalashtirilgan BMT jahon turizm tashkiloti Bosh Assambleyasining 25-sessiyasida ishtirok etishga taklif qilingan. 2023—2026-yillarda O‘zbekiston va Belarusning yetakchi oliy o‘quv yurtlari o‘rtasida “Yo‘l xaritasi”ni ishlab chiqish va tasdiqlash, shuningdek, O‘zbekistonda Belarus kinosi kunlari va Belarusda O‘zbek kinosi kunlarini o‘tkazishga kelishilgan.
Yig‘ilish yakunlari bo‘yicha tadbirlar davomida erishilgan asosiy kelishuvlarni aks ettiruvchi yakuniy protokol, shuningdek, ikki davlat hukumat rahbarlarining o‘zaro tashriflari yakunida erishilgan kelishuvlarni amalga oshirish bo‘yicha “Yo‘l xaritasi” imzolangan.
Izoh (0)