Manfaatlar to‘qnashuvi, kadastrga yordam, yuk mashinasi o‘tganda silkinadigan uy: Toshkent shahri Jamoatchilik kengashi matbuot anjumanida fuqarolar murojaati tinglandi

Toshkent shahri hokimi Jahongir Ortiqxo‘jayev ishtirokida 24-avgust kuni shahar deputatlar kengashi majlisi bo‘lib o‘tgani haqida xabar berilgandi. Unda tashkiliy masala ko‘rib chiqilib, hokim taklifi bilan Jamoatchilik kengashi raisi lavozimiga Furqat Mahmudxo‘jayev tayinlangan. Hokimlikda 25-avgust kuni kengash matbuot anjumani bo‘lib o‘tdi va unda fuqarolar murojaati tinglandi.

Xususan, fuqarolardan biri kengash a’zolari tarkibida deputatlarning bo‘lishi manfaatlar to‘qnashuviga olib kelmaydimi, deb savol yo‘lladi. Mazkur savolga Jamoatchilik kengashi raisi Furqat Mahmudxo‘jayev javob berib o‘tdi.

“Deputatlar haqidagi fikringizga qo‘shilmayman. Hozirgi deputatlar avvalgilardan ancha farq qiladi. Ular manfaatlar to‘qnashuviga yo‘l qo‘ymaydi”, — dedi Mahmudxo‘jayev. Uning so‘zlariga ko‘ra, deputatlar hozirgi kunda ancha faollashgan.

Shuningdek, Bektemir tumanidan kelgan yana bir murojaatchi prezident tomonidan nogironligi bo‘lgan shaxslar uchun ajratiladigan uylardan berilgani, ammo 4 yildan beri kadastr hujjatlari yo‘qligi va bu masalada 12 ta uy nomidan yordam so‘rab kelganini bildirdi.

Furqat Mahmudxo‘jayev esa ushbu murojaat nazoratga olinishi va mas’ullar bilan uchrashuv tashkillashtirib berilishini aytdi.

Bundan tashqari, chilonzorlik murojaatchi 110 nafar oila nomidan kelgani, ular yashaydigan uy “Tashselmash” zavodi yotoqxonasi sifatida qurilgani, hozirgi paytda 1-qavat tadbirkorlarga sotib yuborilgani va asosiy devorlar buzilgani sababli yer silkinganda yuqori qavatdagi uylar uchun jiddiy xavf yuzaga kelganini bildirdi.

U, shuningdek, hududga prezident tashrifi kutilayotgani uchun uyning tashqi tomonlari ta’mirlab qo‘yilgani, ammo ichkari qismlar o‘z holicha qolayotganini ma’lum qildi. “Tashqarisi XXII asr, aylanib o‘tsangiz, IXX asr. Ko‘rmaganning ko‘rgani qursin deb, chiroyli qilib ketishmoqchi. 3–4-qavatlarda esa ahvol yomon — issiq suv, sovuq suv u yerga chiqmaydi”, — deydi murojaatchi. Furqat Mahmudxo‘jayev bu murojaat tez orada o‘rganib chiqilishini bildirdi.

Murojaatlarda, shuningdek, ekologik muammolar, daydi hayvonlarga bo‘layotgan salbiy munosabatlar uchun jiddiy choralar ko‘rish masalasi muhokama qilindi.