Манфаатлар тўқнашуви, кадастрга ёрдам, юк машинаси ўтганда силкинадиган уй: Тошкент шаҳри Жамоатчилик кенгаши матбуот анжуманида фуқаролар мурожаати тингланди

Тошкент шаҳри ҳокими Жаҳонгир Ортиқхўжаев иштирокида 24 август куни шаҳар депутатлар кенгаши мажлиси бўлиб ўтгани ҳақида хабар берилганди. Унда ташкилий масала кўриб чиқилиб, ҳоким таклифи билан Жамоатчилик кенгаши раиси лавозимига Фурқат Маҳмудхўжаев тайинланган. Ҳокимликда 25 август куни кенгаш матбуот анжумани бўлиб ўтди ва унда фуқаролар мурожаати тингланди.

Хусусан, фуқаролардан бири кенгаш аъзолари таркибида депутатларнинг бўлиши манфаатлар тўқнашувига олиб келмайдими, деб савол йўллади. Мазкур саволга Жамоатчилик кенгаши раиси Фурқат Маҳмудхўжаев жавоб бериб ўтди.

«Депутатлар ҳақидаги фикрингизга қўшилмайман. Ҳозирги депутатлар аввалгилардан анча фарқ қилади. Улар манфаатлар тўқнашувига йўл қўймайди», — деди Маҳмудхўжаев. Унинг сўзларига кўра, депутатлар ҳозирги кунда анча фаоллашган.

Шунингдек, Бектемир туманидан келган яна бир мурожаатчи президент томонидан ногиронлиги бўлган шахслар учун ажратиладиган уйлардан берилгани, аммо 4 йилдан бери кадастр ҳужжатлари йўқлиги ва бу масалада 12 та уй номидан ёрдам сўраб келганини билдирди.

Фурқат Маҳмудхўжаев эса ушбу мурожаат назоратга олиниши ва масъуллар билан учрашув ташкиллаштириб берилишини айтди.

Бундан ташқари, чилонзорлик мурожаатчи 110 нафар оила номидан келгани, улар яшайдиган уй «Ташселмаш» заводи ётоқхонаси сифатида қурилгани, ҳозирги пайтда 1-қават тадбиркорларга сотиб юборилгани ва асосий деворлар бузилгани сабабли ер силкинганда юқори қаватдаги уйлар учун жиддий хавф юзага келганини билдирди.

У, шунингдек, ҳудудга президент ташрифи кутилаётгани учун уйнинг ташқи томонлари таъмирлаб қўйилгани, аммо ичкари қисмлар ўз ҳолича қолаётганини маълум қилди. «Ташқариси XXII аср, айланиб ўтсангиз, ИХХ аср. Кўрмаганнинг кўргани қурсин деб, чиройли қилиб кетишмоқчи. 3–4-қаватларда эса аҳвол ёмон — иссиқ сув, совуқ сув у ерга чиқмайди», — дейди мурожаатчи. Фурқат Маҳмудхўжаев бу мурожаат тез орада ўрганиб чиқилишини билдирди.

Мурожаатларда, шунингдек, экологик муаммолар, дайди ҳайвонларга бўлаётган салбий муносабатлар учун жиддий чоралар кўриш масаласи муҳокама қилинди.