O‘zbekiston Respublikasi davlat mustaqilligining 31 yillik bayrami arafasida Farg‘ona viloyatining So‘x tumanida DXX Chegara qo‘shinlarining harbiy xizmatchilari uchun bunyod etilgan ko‘p qavatli uy-joylarni o‘z egalariga tantanali topshirish marosimi bo‘lib o‘tdi. Bu haqda “Daryo” muxbiri Azizjon Ermatov xabar berdi.
Qayd etilishicha, dastlab “Sarikanda” mahallasida 34 milliard so‘m mablag‘ evaziga mukammal ta’mirlangan harbiy qism shtabi binosi, bu yerda yangi qurib bitkazilgan sport zal, klub, tibbiyot maskani hamda 48 ta xonadondan iborat ko‘p qavatli uy-joylar foydalanishga topshirilgan.
Shu munosabat bilan o‘tkazilgan tadbirda Sharqiy harbiy okrug qo‘shinlari qo‘mondonligi, Farg‘ona viloyati hokimligi, DXX viloyat boshqarmasi rahbarlari, keng jamoatchilik vakillari, harbiy xizmatchilar, ularning oila a’zolari ishtirok etdi.
Tadbirda Farg‘ona viloyati hokimi Xayrullo Bozorov so‘zga chiqib, yangi turar-joy binolariga ko‘chib o‘tayotgan harbiy xizmatchilarni hamda ularning oila a’zolarini qutladi.
O‘zbekiston Prezidenti Shavkat Mirziyoyev tashabbusi bilan harbiylar va ularning oila a’zolarini ijtimoiy himoya qilishga alohida e’tibor qaratilayotganini ta’kidladi.
Tumanning “Sharqobod” mahallasida barpo etilgan 48 xonadonga mo‘ljallangan ko‘p qavatli uyda ham harbiylar va ularning oila a’zolari uchun barcha zarur qulayliklar yaratilgan.
“Zamonaviy loyihalar asosida qurilgan uylar shinam. Ularda barcha qulayliklar yaratilgan. Mehmonxona, oshxona va boshqa yordamchi xonalar zamonaviy jihozlangan. Bu yerdagi qulayliklardan ayniqsa, turmush o‘rtog‘im va farzandlarim juda xursand. Vatan oldidagi xizmat burchimizni sharaf bilan bajarish uchun bizga shunday sharoitlar yaratib berilayotganidan minnatdormiz”, – deydi chegara qo‘shinlari harbiy xizmatchilaridan biri.
Izoh (0)