Germaniya taraqqiyot banki O‘zbekiston sog‘liqni saqlash tizimini raqamlashtirish uchun mablag‘ ajratadi

Germaniya taraqqiyot banki — KfW O‘zbekiston sog‘liqni saqlash sohasini raqamlashtirish uchun 45 million yevro imtiyozli kredit va 5,5 million yevro miqdorida grant ajratadi. Bu haqda bank saytida qayd etilgan.

Sog‘liqni saqlash vazirining o‘rinbosari Otabek Fozilkarimov va KfW mintaqaviy vakolatxonasi direktori Andreas Shnayder tegishli shartnomalarni imzolagan. Maqsad O‘zbekiston aholisiga tibbiy xizmat ko‘rsatish sifati va samaradorligini oshirish bo‘yicha raqamli islohotlarni qo‘llab-quvvatlashdir.

Bunday choralar qatoridan tibbiyot xodimlarini axborot texnologiyalari yo‘nalishida o‘qitish, diagnostika va davolash jarayonlarini jadallashtirish imkonini beruvchi bemorlarning elektron bazasini yaratish kabilarni ham o‘z ichiga olgan.

“O‘zbekistonda sog‘liqni saqlash tizimida kamchiliklar mavjud bo‘lib, ular ayniqsa koronavirus inqirozi davrida yaqqol namoyon bo‘ldi. Samarali IT infratuzilmasini yaratish orqali sog‘liqni saqlash tizimini sezilarli darajada yaxshilash mumkin. Bu, ayniqsa, aholining kam ta’minlangan qatlamlari uchun juda muhim”, — deb qayd etgan KfW Bankengruppe boshqaruv kengashi a’zosi Kristian Laibach.