O‘zbekistonning bir qator viloyatlarida sog‘lomlashtirish aksiyalari o‘tkazgan 150 nafardan iborat maxsus bu guruh Toshkent shahrida navbatdagi sayyor qabul va tibbiy ko‘rikni o‘tkazadi. Bu haqda Sog‘liqni saqlash vazirligi matbuot xizmati xabar qildi.
Qayd etilishicha, poytaxtda yashayotgan 2 million 860 mingdan ziyod aholiga bugungi kunda 211 ta tibbiyot muassasasi xizmat ko‘rsatadi. Shundan 167 tasini Toshkent shahar Sog‘liqni saqlash bosh boshqarmasi tasarrufidagi, qolgan 44 tasini esa respublika ixtisoslashtirilgan markazlari va klinik shifoxonalari tashkil etadi.
Toshkentda tashkil etilayotgan sog‘lomlashtirish aksiyasi davomida dastlab shahar aholisi chuqurlashtirilgan tibbiy ko‘rikdan o‘tkaziladi. Qolaversa, ularda aniqlangan kasalliklar bo‘yicha tumanlar kesimida bemorlar ro‘yxatini shakllantirish rejalashtirilgan.
Mamlakatning yetakchi shifokorlari aholi bilan uchrashib, “xonadonbay” tamoyili asosida ko‘p tarqalgan kasalliklar balansini yaratishga ko‘maklashadi. Fuqarolar o‘rtasida tibbiy targ‘ibot tadbirlari o‘tkaziladi. Qolaversa, birlamchi tibbiy-sanitariya muassasalari faoliyatini yaxshilash, aholining sohaga doir muammolariga ijobiy yechim topish ham ko‘zda tutilgan.
Shuningdek, aksiya doirasida poytaxtning qator tumanlarida sayyor qabullar, tibbiy ko‘riklar tashkil etish rejalashtirilgan.
“Sog‘liqni saqlash vazirligi tomonidan o‘tkazilayotgan sog‘lomlashtirish aksiyalari, yurtimizda yashovchi bemorlar huzuriga eng malakali shifokorlar, yetakchi tibbiyot olimlarining o‘zlari kirib borayotgani sifatli tibbiy xizmatni “mahallagacha tushirish”, uni odamlarga yanada yaqinlashtirishga xizmat qilyapti”, — deyiladi xabarda.
Izoh (0)