Jahongir Xo‘jayev dadasiga qimmat mashina sovg‘a qilishiga sabab bo‘lgan voqeani aytib berdi (video)

Aktyor, rejissor, shoumen Jahongir Xo‘jayev “Daryo” internet-nashriga eksklyuziv intervyu berdi. Intervyuni “Daryo” muxbiri Feruz Muhammad tashkillashtirdi.

Jahongir Xo‘jayev suhbat davomida dadasiga qimmatbaho mashina sovg‘a qilishiga sabab bo‘lgan voqea haqida gapirib berdi.

Domlaga nikoh o‘qitdik. Bugun nikoh o‘qitgan bo‘lsak, ertaga to‘yim edi. Islom ota masjidida Fahriddin domla bor. Domla nikohdan keyin ota-ona haqida gapirdilar. Ularning gaplaridan to‘lqinlanib, yuragim g‘alati bo‘lib ketdi.

Keyin yo‘l-yo‘lakay o‘ylab ketyapman. “Rostdan ham, qara sen uchun otang hattoki to‘yingda ham yugurib yuribdi, sen uylanasan, ertaga bolang bilan bo‘lib ketasan, ota-onang qolib ketadi”, deb chuqur o‘ylab qoldim.

Qarasam yonimda Hyundai saloni turgan ekan. To‘xtadimda shartta avto salonga kirdim. Ichimda “o‘zim chet elning mashinasini minibman-u, dadamga olib bermapman”, degan fikr o‘tdi. Meni pulim Tucson degan modeliga yetar ekan. Yordamchimga plastikni berib, “buni ichidagi pulni yechasan, uydan qolgan pulni olib kelasan, xullas shu mashinaga to‘lov qilasan, mashinani eng kichkina ukamning nomiga olasan, mashinani u sovg‘a qilsin”, dedim.

Avto salondagilar biz tanlagan mashina naqd pulga yo‘qligini aytishdi. Keyin undan ham qimmatrog‘ini, eng zo‘r variantini sotib olib, ertasi kuni mashinani olib chiqib ketdik.

Ahmad degan o‘rtog‘im “seni to‘yingda osh yeyman”, deb niyat qilardi, lekin o‘sha kuni u mashinani hujjatlari bilan yugurib yurdi.

Aslida mashina sovg‘a qilish rejamda yo‘q edi. Bir kun avval shunaqa holat bo‘lib ketdi. Instagram'larda “dadajonimga sovg‘a” deb mashina sovg‘a qilishganiga juda havas qilib o‘tirardim. Lekin o‘sha vaqtlarda mashina sovg‘a qilishga pulim yo‘q edi.

Jahongir Xo‘jayev, aktyor, shoumen, rejissor