“Buldozer bilan vahshiylarcha buzib tashlangan”. Ozoda Nursaidova uyi buzilganida tushkunlikka tushgani hamda 300 mln so‘m zarar ko‘rgani haqida (video)

Xonanda Ozoda Nursaidova “Milliy” telekanalining “Zarb” ko‘rsatuviga bergan intervyusida uyda o‘tirgan vaqtda mutasaddilar buldozer bilan uyini buzishga kelgani, bu holatdan so‘ng stressga tushgani, 250-300 million so‘m moddiy zarar ko‘rgani, “vaxshiylarcha” uyini buzishgani haqida gapirdi.

Ozoda Nursaidova uyda o‘tirgan vaqtda mutasaddilar uni ogohlantirmasdan, uyini buzishga buldozer bilan kelgani haqida

Bu mavzu hayotimdagi eng og‘ir damlarni eslatadigan, og‘riqli mavzulardan biri hisoblanadi. Yaqinda bu haqda Konstitutsiyadagi o‘zgarishlarni ko‘rib xursand bo‘ldim. Yakkasaroyda turaman, 2007-yilda bir korxonaning bo‘sh yerini sotib olganman. To‘g‘rirog‘i, uyimni qurgan kompaniya egalari menga shu taklifni bergan. Bozor narxida pulini to‘lab, shu yerni sotib oldim — 2,5 sotix yer edi. Sotib olib hamma narsani hujjatlashtirdim. Oradan olti yil o‘tib, 2013-yilda uyimda o‘tirgan vaqtimda hokimiyatdagi ishlaydiganlar buldozer bilan keldi, yer-joy bilan bog‘liq sud bo‘lgan ekan — xabarim yo‘q edi.

Uyimga buldozer bilan kelib, buzamiz deyishdi, ogohlantirishmadi. Uyingizni buzishimiz kerak, sud bo‘lgan, prokuratura kadastrni bekor qilgan, deyishdi. Bekor qilingani haqida xabarim yo‘q edi, birinchi ma’lumotni o‘sha paytda oldim. Shunda o‘sha payt hokimlikning huquqshunosi menga boshqa bir familiyalarni aytdi va shularning buyrug‘i bor dedi. Suddan yoki hokimlikdan biror-bir da’vogar menga bu haqda aytmagan, deydi xonanda.

Xonanda uyini buzishgandan keyin stressga tushgani va bir necha bor hujjatlari bekor bo‘lgani haqida 

Dastlab apellyatsiyaga beraman dedim, bu holatni o‘rganishni xohladim. Qo‘limda kadastrim bor edi, hokimning ham qarori bor, vaziyatni o‘rgandim, nima sababdan prokuratura tomonidan qaror bekor qilinganini o‘yladim. Menga bitta sabab, ya’ni texnik xato deb aytishdi.

Uch marta hokim o‘zgardi, uch marta mening masalam ko‘tarildi va ikki marta kadastrim bekor bo‘ldi. Menga 2007-yilda bu qarorni bergan hokim ishdan ketganidan keyin 2013-yilda boshqa hokim tomonidan kelib kadastrimni bekor qilmoqchi bo‘ldi, u ham ketganidan so‘ng biz keyingi kadastrni 2018-yilda — boshqa hokim kelganidan keyin oldik. Davlat tomonidan noqonuniy ishlarni qilayotgan shaxslarni deb ko‘p insonlar jabr chekmoqda. Men ham bu holatdan so‘ng stress oldim, moddiy zarar ko‘rdim, 2018-yilda hushimdan ketib qolganman, menda videolari ham bor, deydi Ozoda Nursaidova.

Ozoda Nursaidova uyi “vaxshiylarcha” buzilgani, bundan 250-300 million so‘m zarar ko‘rgani to‘g‘risida 

Yana bir masala bor — uyim Majburiy ijro byurosi tomonidan “vaxshiylarcha” buzilgan, 30 ta odam kelgan. Keyin 2018-yilda uyimni juda tezlik bilan buzishgan, hattoki narsalarimni olib qolishga ulgurmaganman, 250-300 million so‘m atrofida zarar ko‘rganman, bu yerdan tashqari, jihozlarning narxi. Shunaqa “vaxshiylarcha” buzishgan. Bu holatni eslash men uchun og‘ir.

Hozir bu joyga qaramayman ham, to‘rt yil bo‘ldi, men uyim-joyim deydigan insonman, lekin hovliga kirgim, qaragim kelmaydi. Biz o‘zimiz buzib beramiz dedik, hattoki bir soatga ham imkoniyat berishmadi. O‘sha payt soat uchgacha uyimga 35 ta odam kirgan, shu odamlar uyimni oyoqosti qilib, buldozer bilan buzgan, shunda bu uyimning yonidagi uylarga ham zarar yetgan, deydi xonanda.

• “Hozir muammolarimizni hal qiladigan davr”. Ozoda Nursaidova 3 yil avval uyi buzilganidan aziyat chekkani hamda konstitutsiyaning tegishli moddasiga kiritilayotgan o‘zgartirish haqida.
• Instagram: O‘zbekistonni tark etgan Alisher Uzoqov, eri bilan yarashganini inkor etgan Maryam Tillayeva, Ozoda konsertidagi g‘ayrioddiy holatlar.
• Instagram: Ra’no Shodiyeva ilk marta buvi bo‘ladi, Dilnoza Kubayeva — “homilador”, Liil Xurramovning Ozoda Nursaidovaga syurprizi.
• Instagram: Rossiya prezidentidan sovg‘a olgan Ozoda, Sardor Mamadaliyevning qanday biznesi bor? Yulduz Usmonova ishtirokidagi  muhokamalarga sabab bo‘layotgan to‘y.