Жаҳонгир Хўжаев дадасига қиммат машина совға қилишига сабаб бўлган воқеани айтиб берди (видео)

Актёр, режиссёр, шоумен Жаҳонгир Хўжаев «Дарё» интернет-нашрига эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Жаҳонгир Хўжаев суҳбат давомида дадасига қимматбаҳо машина совға қилишига сабаб бўлган воқеа ҳақида гапириб берди.

Домлага никоҳ ўқитдик. Бугун никоҳ ўқитган бўлсак, эртага тўйим эди. Ислом ота масжидида Фаҳриддин домла бор. Домла никоҳдан кейин ота-она ҳақида гапирдилар. Уларнинг гапларидан тўлқинланиб, юрагим ғалати бўлиб кетди.

Кейин йўл-йўлакай ўйлаб кетяпман. «Ростдан ҳам, қара сен учун отанг ҳаттоки тўйингда ҳам югуриб юрибди, сен уйланасан, эртага боланг билан бўлиб кетасан, ота-онанг қолиб кетади», деб чуқур ўйлаб қолдим.

Қарасам ёнимда Hyundai салони турган экан. Тўхтадимда шартта авто салонга кирдим. Ичимда «ўзим чет элнинг машинасини минибман-у, дадамга олиб бермапман», деган фикр ўтди. Мени пулим Tucson деган моделига етар экан. Ёрдамчимга пластикни бериб, «буни ичидаги пулни ечасан, уйдан қолган пулни олиб келасан, хуллас шу машинага тўлов қиласан, машинани энг кичкина укамнинг номига оласан, машинани у совға қилсин», дедим.

Авто салондагилар биз танлаган машина нақд пулга йўқлигини айтишди. Кейин ундан ҳам қимматроғини, энг зўр вариантини сотиб олиб, эртаси куни машинани олиб чиқиб кетдик.

Аҳмад деган ўртоғим «сени тўйингда ош ейман», деб ният қиларди, лекин ўша куни у машинани ҳужжатлари билан югуриб юрди.

Аслида машина совға қилиш режамда йўқ эди. Бир кун аввал шунақа ҳолат бўлиб кетди. Instagram'ларда «дадажонимга совға» деб машина совға қилишганига жуда ҳавас қилиб ўтирардим. Лекин ўша вақтларда машина совға қилишга пулим йўқ эди.

Жаҳонгир Хўжаев, актёр, шоумен, режиссёр