So‘nggi kunlarda Instagram tarmog‘ida ko‘plab o‘zbek san’atkorlari “Mening to‘yim” nomli musiqiy filmda suratga tushayotgani haqida xabarlar tarqaldi. Rejissor Zebo Navro‘zova “Daryo” muxbirlarini kenja o‘g‘li Muhammadali Navro‘zov rejissorligida suratga olingan “Mening to‘yim” filmining yopiq premyerasiga taklif etdi.
“Mening to‘yim” filmining yopiq premyerasida o‘zbek shou-biznesining ko‘plab vakillari, vaynerlar va kino olamining ko‘zga ko‘ringan vakillari ishtirok etdi.
Shu yilning yoz oyida film bilan bog‘liq ko‘p piarlar tarqalgandi. Shulardan biri stilist Akobir Ashuraliyev “Afandining qizlari” jamoasidagi Nigina Jabborovaning qo‘lini so‘ragani haqida edi. Ammo aynan “Modda haftaligi”dagi qizning qo‘lini so‘rash sahnasi filmga kiritilmagan.
Filmda bosh rollarni Muhammadali Navro‘zov va Sitora Alimjonovalar talqin etgan. Bundan tashqari, Muyassar Berdiqulova, Tolib Mo‘minov, Feruza Sobitova, Rixsitilla Abdullayev kabi O‘zbek milliy akademik drama teatrining ko‘zga ko‘ringan aktyorlari ham asosiy rollarni ijro etgan.
Bundan tashqari, musiqiy filmda Shohruxxon, Asal Shodiyeva, Munisa Rizayeva, Umidaxon, Abduvali Rajabov kabi shou-biznes vakillari ham suratga tushgan. Aktrisa Asal Shodiyeva turmush o‘rtog‘i bilan birga duet kuylagan.
Xonanda Shohruxxon ukasini qo‘llab-quvvatlash uchun premyeraga tashrif byuurdi. Ammo to‘y xizmatlari ko‘pligi sabab, film boshlanmasidan avval zalni tark etdi.
Ko‘p rejissorlar bilan hamkorlik qilishni istamaydigan Asal Shodiyeva Muhammadalini qo‘llab-quvvatlash uchun premyeradan ancha avvalroq kinozalga tashrif buyurdi. Ammo uning filmdagi roli u qadar katta emas.
Rejissor Muhammadali Navro‘zov oilaviy do‘sti Umidaxonga alohida minnatdorlik bildirdi. Xonanda o‘sha kuni premyera sabab barcha xizmatlaridan voz kechganini ta’kidlab o‘tdi.
Xonanda Ruxshona ham tomoshabinlar safidan joy oldi.
— Muhammadali rolga taklif qilgandi-da xursand bo‘ldim. Chunki filmda ko‘plab tengdosh do‘stlarim, yaqinlarim suratga tushgan. Men o‘zimni syomka uchun emas, balki do‘stlarim bilan tog‘ga dam olgani uchun borgandek his qildim. Mazza qilib ishladik. Suratga olish vaqtida juda ko‘p qiziqarli voqealar bo‘ldi, — deydi bosh rol ijrochisi Sitora Alimjonova.
Film ijodkorlari, suratga olish ishlari o‘n kun davomida Toshkent viloyatining So‘qoq qishlog‘ida bo‘lib o‘tganini ma’lum qilishdi.
Mazkur musiqiy film kinoteatrlarda namoyish etilmaydi, uni faqat Muhammadali Navro‘zov g‘oyasi asosida tashkil etilgan platforma orqali tomosha qilish mumkin.
Muhammadali Navro‘zov 23-avgust kuni nafaqat film taqdimotini, balki tavallud kunini ham nishonladi.
— O‘g‘limning ilk rejissorlik ishi. Film juda qisqa vaqtda suratga olindi. Mazza qilib tomosha qiladigan film bo‘lgan. Ammo yaratgan roli hayotdagi fe’l-atvoridan mutlaqo farq qiladi. Muhammadali hayotda jiddiy, bitta gap kam, ikkita ko‘plik qiladigan inson. Filmda esa butunlay boshqa qiyofani gavdalantirgan, — deydi rejissor Zebo Navro‘zova.
Film ijodkorlari uni ana shunday tarzda tabriklashdi.
Rejissor va aktyor Azamat Ahrorov premyeraga turmush o‘rtog‘i bilan tashrif buyurdi.
Asal Shodiyeva negadir film borasidagi taassurotlari bilan o‘rtoqlashishni istamadi.
Film premyerasining yana bir esda qolarli voqealaridan biri ancha vaqtdan buyon Rossiyada istiqomat qilayotgan aktrisa Zarina Nizomiddinovaning tashrif buyurgani bo‘ldi. U bilan suratga tushish istagini bildirgan ijodkorlar soni nihoyatda ko‘p edi.
— “23 TV” asoschisi men desam bo‘ladi, ammo hozirgi kunda faqat ish yurituvchi vazifasini bajaryapman. Uning rahbarlari boshqa insonlar. Men media sohasidagi loyihalarni amalga oshiryapman. Ya’ni qo‘lida kuchi, iste’dodi bor ijodkorlarni to‘plab turli ijodiy loyihalarni amalga oshiryapmiz. Kanalni rivojlantirish bilan birga o‘zimizning ijodiy loyihalarimizni ham amalga oshiramiz. Kelajakda televideniye ochish niyatimiz ham bor. “Mening to‘yim” filmi ham aynan mana shu loyihalar uchun tasvirga olindi, — deydi rejissor Muhammadali Navro‘zov.
Izoh (0)