Ijtimoiy tarmoqlarda Namangan viloyati hokimi Namangan shahridagi “Okean” suv sporti saroyiga kelishni boshlaganidan so‘ng suzish bo‘yicha mashg‘ulotlar o‘tkazish muammoga aylangani haqida xabarlar tarqaldi. “Daryo” ushbu holatga oydinlik kiritish maqsadida mazkur majmua mutasaddilari bilan bog‘landi.
“Okean” suv sporti saroyi direktori Rasuljon Nizambayevning bildirishicha, xabarlardagi “viloyat hokimi bu yerga kelishni boshlaganidan so‘ng” degan jumlaning o‘zi xato, chunki Shavkat Abdurazzaqov Namangan shahri hokimi lavozimida ishlab turganida ham majmuaga muntazam kelib turgan.
Qolaversa, suv sporti saroyiga keluvchi guruhlarning o‘zaro kelishgan holda mashg‘ulotlar vaqtini oldinga yoki keyinga surishi yangilik emas va bu shartnomalarda ko‘rsatilgan.
Majmua yakshanbadan tashqari har kuni ertalab soat 5:00 dan kechki soat 22:00 gacha ochiq. Nafaqat Namangandan, hatto qo‘shni viloyatlardan ham shug‘ullanuvchilar kelib turibdi, chunki saroyimizning aksariyat parametrlar bo‘yicha tengi yo‘q. Ko‘plab korxona-tashkilotlar bilan xodimlarini sog‘lomlashtiruvchi guruhlarga jalb etish bo‘yicha shartnomalar tuzganmiz. Har yili kasaba uyushmalari yo‘nalishi bo‘yicha 1400 kishiga imtiyozli yo‘llanma ajratiladi. Imkoniyati cheklangan va nogironligi bo‘lgan yigit-qizlarni ham to‘garaklarimizga jalb etganmiz. Umuman, hozirda jami 500 nafarga yaqin odam saroyimizga qatnayapti, milliy terma jamoalarimiz yig‘inlari, yirik sport musobaqalari muntazam o‘tkazilyapti. Aytmoqchi bo‘lganim, bizda mashg‘ulotlar o‘tkazish hech qachon muammoga aylanmagan, — deydi Rasuljon Nizambayev.
Nizambayevning qayd etishicha, shug‘ullanuvchilar mashg‘ulotlarga kelishlarida muammo tug‘ilmasligidan birinchi galda majmua ma’muriyatining o‘zi manfaatdor, chunki suv sporti saroyi to‘liq xo‘jalik hisobida faoliyat yuritadi.
Ma’lumot uchun, O‘zbekiston kasaba uyushmalari federatsiyasi ta’sischiligidagi “Okean” suv sporti 2019-yil aprel oyida foydalanishga topshirilgan bo‘lib, basseyn va fitnes zallariga ega.
Izoh (0)