Ижтимоий тармоқларда Наманган вилояти ҳокими Наманган шаҳридаги «Океан» сув спорти саройига келишни бошлаганидан сўнг сузиш бўйича машғулотлар ўтказиш муаммога айлангани ҳақида хабарлар тарқалди. «Дарё» ушбу ҳолатга ойдинлик киритиш мақсадида мазкур мажмуа мутасаддилари билан боғланди.
«Океан» сув спорти саройи директори Расулжон Низамбаевнинг билдиришича, хабарлардаги «вилоят ҳокими бу ерга келишни бошлаганидан сўнг» деган жумланинг ўзи хато, чунки Шавкат Абдураззақов Наманган шаҳри ҳокими лавозимида ишлаб турганида ҳам мажмуага мунтазам келиб турган.
Қолаверса, сув спорти саройига келувчи гуруҳларнинг ўзаро келишган ҳолда машғулотлар вақтини олдинга ёки кейинга суриши янгилик эмас ва бу шартномаларда кўрсатилган.
Мажмуа якшанбадан ташқари ҳар куни эрталаб соат 5:00 дан кечки соат 22:00 гача очиқ. Нафақат Намангандан, ҳатто қўшни вилоятлардан ҳам шуғулланувчилар келиб турибди, чунки саройимизнинг аксарият параметрлар бўйича тенги йўқ. Кўплаб корхона-ташкилотлар билан ходимларини соғломлаштирувчи гуруҳларга жалб этиш бўйича шартномалар тузганмиз. Ҳар йили касаба уюшмалари йўналиши бўйича 1400 кишига имтиёзли йўлланма ажратилади. Имконияти чекланган ва ногиронлиги бўлган йигит-қизларни ҳам тўгаракларимизга жалб этганмиз. Умуман, ҳозирда жами 500 нафарга яқин одам саройимизга қатнаяпти, миллий терма жамоаларимиз йиғинлари, йирик спорт мусобақалари мунтазам ўтказиляпти. Айтмоқчи бўлганим, бизда машғулотлар ўтказиш ҳеч қачон муаммога айланмаган, — дейди Расулжон Низамбаев.
Низамбаевнинг қайд этишича, шуғулланувчилар машғулотларга келишларида муаммо туғилмаслигидан биринчи галда мажмуа маъмуриятининг ўзи манфаатдор, чунки сув спорти саройи тўлиқ хўжалик ҳисобида фаолият юритади.
Маълумот учун, Ўзбекистон касаба уюшмалари федерацияси таъсисчилигидаги «Океан» сув спорти 2019 йил апрель ойида фойдаланишга топширилган бўлиб, бассейн ва фитнес залларига эга.
Изоҳ (0)