XTV abituriyentlarning yarmidan ko‘pi o‘tish ballini to‘play olmaganiga munosabat bildirdi

O‘zbekistonda 2022/2023-o‘quv yilida 1 730 821 nafar abituriyent imtihon topshirgan bo‘lib, ularning 51,2 foizi o‘tish ballini to‘play olmagani haqida xabar berilgandi. Xalq ta’limi vazirligi holatga munosabat bildirdi.

Davlatimiz ravnaqi va kelajagi, xalqimizning farovon turmush tarzini ta’minlashda bugungi yosh avlod kamolotining o‘rni va ahamiyati naqadar muhim ekanligini barchamiz yaxshi anglab turibmiz. Shu boisdan bu borada kuyunchaklik bilan bildirilayotgan turli fikr-mulohazalarning ham juda o‘rinli ekanligini ta’kidlab o‘tamiz.

Muhokama qilinayotgan ko‘rsatkichlar barcha test sinovlarida qatnashgan 1 milliondan ortiq abituriyentlarning natijalari ekanligiga ham e’tiborni qaratish lozim, deb hisoblaymiz, — deyiladi vazirlik munosabatida.

2021-yilda bitiruvchilarning o‘rtacha bali (samaradorlik ko‘rsatkichi) 2020-yilga nisbatan 69,8 balldan 74,9 ballga, ya’ni 5.1 ballga oshgan. Shuningdek, past natija ko‘rsatgan (56,7 balldan kam) bitiruvchilarning ulushi 2021-yilda 2020-yilga nisbatan qariyb 13 foizga yoki -35 232 nafarga kamaygan.

Jumladan, 2020-yilda 56.7 balldan past natija ko‘rsatgan bitiruvchi-o‘quvchilar 138 780 nafar (yoki 46 foiz)ni tashkil qilgan bo‘lsa, 2021-yilda bu ko‘rsatkich 103 548 nafar (yoki 33 foiz)ni tashkil etgan.

Albatta, hozirgi kundagi maktab bitiruvchilarining bilimi va ko‘nikmalari past ekanligini qayd etish kerak. Hozirgi kunda maktab ta’limida ta’lim mazmunini yangilash hamda pedagoglarning malakasini oshirish bo‘yicha boshlangan qadamlar, sekin-astalik bilan bitiruvchilarning darajasiga ijobiy ta’sir ko‘rsatadi, deb o‘ylaymiz.

Shuni ham ta’kidlab o‘tishni istardikki, hozirgi vaqtda Xalq ta’limi vazirligi tomonidan Davlat test markazi bilan hamkorlikda bitiruvchilarning maktab yakuniy davlat imtihonlari natijalariga ko‘ra oliy ta’lim muassasalariga kirishini tashkil etish, maktab bitiruv imtihonlarini unifikatsiyalashtirish borasida ishlar olib borilmoqda, deyiladi xabarda.