O‘zbekistonga amaliy tashrif bilan bo‘lib turgan Koreya Respublikasi Milliy Assambleyasi Qurilish va transport masalalari qo‘mitasi raisi Kim Du Gvan boshchiligidagi delegatsiya favqulodda vaziyatlar vazirining o‘rinbosari Azizbek Latifjonov bilan uchrashdi, deya xabar bermoqda Dunyo axborot agentligi.
Qayd etilishicha, muloqot chog‘ida tomonlar yong‘in xavfsizligi sohasidagi ikki tomonlama hamkorlikni faollashtirish, O‘zbekistonda yong‘inga qarshi sanoatni rivojlantirish masalalarini muhokama qilgan. Tomonlar ikki mamlakat o‘rtasida yong‘in xavfsizligi sohasidagi hamkorlik rivojining ijobiy dinamikasini qayd etgan.
Uchrashuvda Janubiy Koreya—O‘zbekiston biznes uyushmasi raisining birinchi o‘rinbosari Kim Chang Keon, “TDC Co, .Ltd” kompaniyasi prezidenti Choy In Chang va boshqalar Koreya Respublikasi yong‘in xavfsizligi assotsiatsiyasi bilan hamkorlikda O‘zbekistonda fuqarolarni yong‘in xavfsizligi va favqulodda vaziyatlarga javob berishga o‘rgatish uchun zamonaviy o‘quv markazi barpo etish loyihasi bo‘yicha atroflicha ma’lumot bergan. Tomonlar ushbu loyihani tez va muvaffaqiyatli amalga oshirish uchun davlat va xususiy sektorlari hamkorligi orqali faol yordam ko‘rsatishga kelishib olgan.
O‘zbekistonda fuqarolarni yong‘in xavfsizligi va favqulodda vaziyatlarga javob berishga o‘rgatish uchun zamonaviy o‘quv markazi qariyb 30 million dollarlik to‘g‘ridan-to‘g‘ri investitsiya hisobidan, taxminan 5 gektar maydonda barpo etiladi.
Ta’kidlanishicha, 2022-yil iyun oyida O‘zbekistonga Janubiy Koreya tomonidan 8 dona maxsus o‘t o‘chirish avtomobili va tibbiy texnika, shuningdek, himoya vositalari va jihozlari beg‘araz yetkazib berilgan. Avgust oyida esa ushbu uskunani ishlatish bo‘yicha Toshkent va Farg‘ona viloyatlari Favqulodda vaziyatlar boshqarmalarida janubiy koreyalik mutaxassislar ishtirokida o‘quv kurslari tashkil etilgan.
Izoh (0)