Qoraqalpog‘istonda 2016-yildan buyon faoliyat yuritib kelayotgan eng katta auditoriyaga ega internet nashri faoliyatini to‘xtatdi. Bu haqda saytning Telegram’dagi rasmiy sahifasida ma’lum qilingan.
“Qoraqalpog‘istonda birinchi bo‘lib faoliyatini boshlagan, marhum Furqat Yusupov asos solgan “KRuz.uz” sayti faoliyatini yakunlayapti. Bundan keyin “KRuz.uz” nomi bilan ochilgan har qanday tarmoq yoki guruhlar endi rasmiy statusga ega bo‘lmaydi”, — deyiladi saytning Telegram’dagi sahifasida.
AOKAning Qoraqalpog‘iston Respublikasi boshqarmasi bosh mutaxassisi Batir Yerejepovning “Daryo” jurnalisti Otabek Qo‘ldoshevga ma’lumot berishicha, sayt marhum Furqat Yusupov o‘limidan so‘ng uning ukasi Iskandar Yusupov mas’ulligida faoliyat yuritgan.
“Hozir Iskandar bilan suhbatlashdim, nega bunaqa bo‘ldi deb so‘radim. U o‘zining alohida ishi borligini, sayt faoliyatini davom ettirishga vaqti bo‘lmayotganini aytib, shunday qaror qabul qilganini bildirdi. Afsus, sayt eng katta auditoriyaga ega saytlardan biri edi”, — deydi Batir Yerejepov.
Batir Yerejepovning qo‘shimcha qilishicha, ayni kunda respublikada 14 ta sayt, 37 ta gazeta, 6 ta jurnal va 5 ta TV faoliyat yuritib kelmoqda.
Ma’lumot uchun, “KRuz.uz” sayti 2016-yili O‘zbekiston miqyosida o‘tkazilgan “MIT.uz” tanlovida “Ikki tilda faoliyat olib boradigan eng yaxshi veb-sayt” nominasiyasida g‘olib deb topilgan.
Izoh (0)