Қорақалпоғистонда 2016 йилдан буён фаолият юритиб келаётган энг катта аудиторияга эга интернет нашри фаолиятини тўхтатди. Бу ҳақда сайтнинг Telegram’даги расмий саҳифасида маълум қилинган.
«Қорақалпоғистонда биринчи бўлиб фаолиятини бошлаган, марҳум Фурқат Юсупов асос солган «KRuz.uz» сайти фаолиятини якунлаяпти. Бундан кейин «KRuz.uz» номи билан очилган ҳар қандай тармоқ ёки гуруҳлар энди расмий статусга эга бўлмайди», — дейилади сайтнинг Telegram’даги саҳифасида.
АОКАнинг Қорақалпоғистон Республикаси бошқармаси бош мутахассиси Батир Ережеповнинг «Дарё» журналисти Отабек Қўлдошевга маълумот беришича, сайт марҳум Фурқат Юсупов ўлимидан сўнг унинг укаси Искандар Юсупов масъуллигида фаолият юритган.
«Ҳозир Искандар билан суҳбатлашдим, нега бунақа бўлди деб сўрадим. У ўзининг алоҳида иши борлигини, сайт фаолиятини давом эттиришга вақти бўлмаётганини айтиб, шундай қарор қабул қилганини билдирди. Афсус, сайт энг катта аудиторияга эга сайтлардан бири эди», — дейди Батир Ережепов.
Батир Ережеповнинг қўшимча қилишича, айни кунда республикада 14 та сайт, 37 та газета, 6 та журнал ва 5 та ТВ фаолият юритиб келмоқда.
Маълумот учун, «KRuz.uz» сайти 2016 йили Ўзбекистон миқёсида ўтказилган «MIT.uz» танловида «Икки тилда фаолият олиб борадиган энг яхши веб-сайт» номинациясида ғолиб деб топилган.
Изоҳ (0)