Toshkent viloyati xalq ta’limi boshqarmasi boshlig‘i Azamat Kamolov viloyatdagi maktab bitiruvchilarining oliy ta’lim muassasalariga kirish ko‘rsatkichi pastligini aytib, maktab direktorlarini tanqid qildi. Bu haqda viloyat hokimligi axborot xizmati mas’uli Nozim Abdulla o‘zining Facebook’dagi sahifasida ma’lum qilgan.
“Hurmatli mudirlar, Davlat test markazining dastlabki natijalarni ko‘rdingiz, hamma kanallar bunga qanday munosabat berayotganini ham bildingiz. Umumiy abituriyentlar soniga nisbatan 55,9 foiz abituriyent 51,2 ballni ham ololmagan. 101 ming 239 nafar abituriyentning 23 ming 24 mingi — bu yil maktablarni tamomlagan abituriyentlar. Mayli, qolganlari uch yil oldin, besh yil oldin, boringki, 10 yil oldin bitirgan bo‘lishi mumkin. Lekin hammasi Toshkent viloyati maktablarini bitirgan-ku, to‘g‘rimi? Shu o‘quvchilarga dars bergan o‘qituvchilarimiz haliyam dars beryapti. Shu o‘quvchilar tahsil olgan paytda ishlagan direktorlar, 10-15, 20-25 yil ishlagan direktorlar ham ko‘p yillik direktorman deb ko‘kragini kerib, joyini bo‘shatgisi kelmaydi. Xatosi uchun sal chora ko‘rsang, ming xil joyga murojaat qilib, ming xil ig‘vo qilib, kanallarga chiqaradiganlar yuribdi oramizda. Ishining, ko‘rsatkichining tayini yo‘q, lekin kreslosini bergisi kelmaydi. Ana shu direktorlarga gapimni yetkazinglar, bugungi natijalar hammamizning faoliyatimizga berilgan baholar”, — deydi viloyat XTB boshlig‘i Azamat Kamolov.
Mudir Qashqadaryo va Samarqand viloyatlaridagi abituriyentlar Toshkent viloyatidagi abituriyentlarga nisbatan yaxshiligini e’tirof etgan.
“Men har safar maktab direktori bilan ham, o‘qituvchi bilan ham ko‘rishganimda o‘qituvchi darsga tayyorgarliksiz kirayotganini aytyapman. Nafaqat bugun, oxirgi besh-o‘n yilda shu holat kuzatilyapti. O‘quvchiga biz bekorga 14 ta fanni o‘qitib, attestatiga o‘sha baholarni qo‘ymaymiz-ku. Matematikadan 4 va 3 baholar qo‘yganmiz, hech kimga 2 baho qo‘yib, qo‘liga attestat bermaganmiz. Lekin abituriyent imtihonga kelib, 2 baho ham ololmayapti. Yarmidan ko‘p abituriyent 1 baho olyapti. Demak, 2 bahoga ham loyiq bo‘lmagan bolalarga biz sun’iy baho qo‘yib, maktabni tamomlatyapmiz. Bitiruvchini dastlabki fundamental bilimga ham ega qilmayapmiz. Shuning uchun hamma maktab hozir o‘tirib, shuni tahlil qilsin. Bu natija — 35 ming o‘quvchiga berilgan baho”, — dedi mas’ul.
XTB rahbari maktab o‘qituvchilari darsga tayyorgarlik kirib ko‘rishi kerakligini ta’kidlamoqda.
“Bu natijani rad qilib, o‘zimizni oqlashimiz kerak emas. O‘z ustimizda ishlashimiz, darsga tayyor bo‘lib kirishimiz kerak. Pedagog degani bola yetaklovchi degani, men bola yetaklayapman, birovga bilim beryapman, shuning orqasidan oylik olib, bolamga yediryapman deb vijdonan ishlaylik”, — degan rahbar.
Izoh (0)