Тошкент вилояти халқ таълими бошқармаси бошлиғи Азамат Камолов вилоятдаги мактаб битирувчиларининг олий таълим муассасаларига кириш кўрсаткичи пастлигини айтиб, мактаб директорларини танқид қилди. Бу ҳақда вилоят ҳокимлиги ахборот хизмати масъули Нозим Абдулла ўзининг Facebook’даги саҳифасида маълум қилган.
«Ҳурматли мудирлар, Давлат тест марказининг дастлабки натижаларни кўрдингиз, ҳамма каналлар бунга қандай муносабат бераётганини ҳам билдингиз. Умумий абитуриентлар сонига нисбатан 55,9 фоиз абитуриент 51,2 баллни ҳам ололмаган. 101 минг 239 нафар абитуриентнинг 23 минг 24 минги — бу йил мактабларни тамомлаган абитуриентлар. Майли, қолганлари уч йил олдин, беш йил олдин, борингки, 10 йил олдин битирган бўлиши мумкин. Лекин ҳаммаси Тошкент вилояти мактабларини битирган-ку, тўғрими? Шу ўқувчиларга дарс берган ўқитувчиларимиз ҳалиям дарс беряпти. Шу ўқувчилар таҳсил олган пайтда ишлаган директорлар, 10-15, 20-25 йил ишлаган директорлар ҳам кўп йиллик директорман деб кўкрагини кериб, жойини бўшатгиси келмайди. Хатоси учун сал чора кўрсанг, минг хил жойга мурожаат қилиб, минг хил иғво қилиб, каналларга чиқарадиганлар юрибди орамизда. Ишининг, кўрсаткичининг тайини йўқ, лекин креслосини бергиси келмайди. Ана шу директорларга гапимни етказинглар, бугунги натижалар ҳаммамизнинг фаолиятимизга берилган баҳолар», — дейди вилоят ХТБ бошлиғи Азамат Камолов.
Мудир Қашқадарё ва Самарқанд вилоятларидаги абитуриентлар Тошкент вилоятидаги абитуриентларга нисбатан яхшилигини эътироф этган.
«Мен ҳар сафар мактаб директори билан ҳам, ўқитувчи билан ҳам кўришганимда ўқитувчи дарсга тайёргарликсиз кираётганини айтяпман. Нафақат бугун, охирги беш-ўн йилда шу ҳолат кузатиляпти. Ўқувчига биз бекорга 14 та фанни ўқитиб, аттестатига ўша баҳоларни қўймаймиз-ку. Математикадан 4 ва 3 баҳолар қўйганмиз, ҳеч кимга 2 баҳо қўйиб, қўлига аттестат бермаганмиз. Лекин абитуриент имтиҳонга келиб, 2 баҳо ҳам ололмаяпти. Ярмидан кўп абитуриент 1 баҳо оляпти. Демак, 2 баҳога ҳам лойиқ бўлмаган болаларга биз сунъий баҳо қўйиб, мактабни тамомлатяпмиз. Битирувчини дастлабки фундаментал билимга ҳам эга қилмаяпмиз. Шунинг учун ҳамма мактаб ҳозир ўтириб, шуни таҳлил қилсин. Бу натижа — 35 минг ўқувчига берилган баҳо», — деди масъул.
ХТБ раҳбари мактаб ўқитувчилари дарсга тайёргарлик кириб кўриши кераклигини таъкидламоқда.
«Бу натижани рад қилиб, ўзимизни оқлашимиз керак эмас. Ўз устимизда ишлашимиз, дарсга тайёр бўлиб киришимиз керак. Педагог дегани бола етакловчи дегани, мен бола етаклаяпман, бировга билим беряпман, шунинг орқасидан ойлик олиб, боламга едиряпман деб виждонан ишлайлик», — деган раҳбар.
Изоҳ (0)