Chirchiq shahri hokimi: “Biz yoshligimizda to‘p tepardik, hozirgi yoshlar axborot asri yoshlari — ularga bilim berish ham juda mas’uliyatli”

Chirchiq shahri hokimi Davron Hidoyatov shahardagi 5-son umumta’lim maktabida bo‘lib o‘tgan ustozlar forumida so‘z olib, bugungi kun o‘qituvchilari juda mas’uliyatli kasb egalari ekanini ta’kidladi, deya xabar berdi “Daryo” muxbiri.

Ma’lum bo‘lishicha, bugun Chirchiq shahar xalq ta’limi bo‘limi tashabbusi bilan shahardagi 5-sonli umumta’lim maktabida yangi o‘quv yili oldidan ustozlar forumi bo‘lib o‘tgan.

Forumda so‘z olgan shahar hokimi Davron Hidoyatov shahar xalq ta’limiga qarashli 24 ta maktabda ham natija yaxshi ekanini, o‘tgan o‘quv yilida shahar maktablarining bitiruvchilari viloyatdagi maktab bitiruvchilariga nisbatan yaxshi natija ko‘rsatganini ma’lum qildi.

Maktab bitiruvchilarining Oliy ta’lim muassasalariga kirish ko‘rsatkichi viloyat miqyosida olganimizda yaxshi natija bo‘ldi. Biroq bu yil undan ham yaxshi natija qayd etilishi kerak, — dedi shahar hokimi.

Shahar xalq ta’limi bo‘limi mudiri Nazokat O‘razovaning aniqlik kiritishicha, o‘tgan o‘quv yilida Chirchiqdagi maktab bitiruvchilarining 31 foizi OTM talabasi bo‘lgan.

Biz yoshligimizda faqat to‘p tepardik. Hozirgi zamon yoshlarining esa to‘p tepishga vaqti yo‘q. Sababi ular axborot texnologiyalaridan unumli foydalanadi. Ular ijtimoiy tarmoqlarni diqqat bilan kuzatadi. Shu sabab ham ularga ta’lim berish, ular istayotgan bilimni ulashish juda mas’uliyatli. Bugungi kun o‘qituvchisi shu sabab ham juda bilimli, tajribali bo‘lishi kerak, — dedi Davron Hidoyatov.

Forum davomida yosh avlodning intellektual va ma’naviy salohiyatini yuksaltirishga hissa qo‘shgan o‘qituvchilar shahar hokimi hamda xalq ta’limi bo‘limining Faxriy yorliq, esdalik sovg‘alari bilan taqdirlandi.