Telegram’da tez esda qoladigan foydalanuvchi ismlarini sotish bo‘yicha auksionlar bo‘lib o‘tadigan platforma paydo bo‘lishi mumkin. Bu haqda messenjer asoschisi Pavel Durov o‘z Telegram-kanalida ma’lum qildi, deb yozadi Meduza.
“Agar biz auksionga oldindan band qilib qo‘yilgan foydalanuvchi ismlarini, guruhlar va kanallarga havolalarni qo‘ysak, Telegram o‘zining 700 million foydalanuvchisi bilan qanchalik darajada muvaffaqiyatli bo‘lishi mumkin edi, tasavvur qiling. @storm yoki @royal kabi millionlab tez esda qoluvchi t.me-manzillarga qo‘shimcha ravishda barcha to‘rt harfli foydalanuvchi ismlari (@bank, @club, @game, @gift) ham sotilishi mumkin bo‘lardi”, — deb yozdi Durov.
Telegram ekotizimining boshqa unsurlari, shu jumladan, stikerlar yoki emodzilar ham sotuvga qo‘yilishi mumkin bo‘ladi. Foydalanuvchilar smart-shartnomalar orqali himoyalangan oldi-sotdi bitimlari bilan ularni bir-biriga berishi mumkin bo‘lardi.
“Keling, Telegram’ga yaqin haftalar ichida biroq Web 3.0 qo‘sha olarmikanmiz, ko‘ramiz”, — deya qo‘shib qo‘ydi Telegram asoschisi.
Dastlab u foydalanuvchilarga uning postiga reaksiyalar qoldirish imkoniyatini berdi. Post 21,3 mingdan ortiq dizlayk va qariyb 6,5 mingta layk to‘plaganidan keyin Durov reaksiyalarni bekitib qo‘ydi.
Iyun oyida Telegram’da pulli obuna paydo bo‘ldi, uning narxi mamlakatga qarab oyiga 4,99 yoki 5,69 yevroga teng.
Pulli obuna Telegram’dagi ba’zi cheklovlarni aylanib o‘tish imkonini berdi, xususan, fayllarni tezroq yuklab olish, reklamani o‘chirish, ovozli xabarlarni matnga aylantirish, kanallarga 1000 tagacha obunani rasmiylashtirish va 10 tagacha chatni biriktirish.
Avgustda Telegram pulli obuna funksiyalarini kengaytirdi. Endi u suhbatdoshlarga ovozli va videoli xabarlarni yuborishni taqiqlash imkoni beradi.
Pavel Durovning aytishicha, agar foydalanuvchilarning 2,5—3 foizi pulli obunani rasmiylashtirsa, messenjer o‘zining barcha xarajatlarini qoplaydi.
Izoh (0)